काठमाडौं (हाम्रो खेलकुद) – क्यामरुनी फरवार्ड मेसुके ओलोमोउले दुई गोल गरेपछि फुटबल क्लब खुमलटारले त्रिभुवन आर्मी फुटबल क्लबविरुद्ध पहिलो हाफमा २-१ को अग्रता लिएको छ ।

सातौं मिनेटमा मेसुके ओलोमोउले गोल गर्दै खुमलटारलाई अग्रता दिलाए । स्टेफन बिनोङको क्रसमा राजीव लोप्चनले पेनाल्टी क्षेत्र भित्रबाट मेसुकेलाई पास दिएपछि क्यामरुनी फरवार्डले शक्तिशाली प्रहारमार्फत गोल गरे ।

१८ औं मिनेटमा आर्मीले बराबरी गोल फर्कायो । नवयुग श्रेष्ठले सिजनको चौथो गोल गर्ने क्रममा पेनाल्टीमा बराबरी गोल गरेका थिए । नवयुगकै फ्लिक अभिषेक लिम्बुले पेनाल्टी क्षेत्रभित्र हातले रोकेपछि रेफ्रीले पेनाल्टी दिएका थिए ।

२७ औं मिनेटमा मेसुकेले फ्रिकिकमा गोल गर्दै खुमलटारको अग्रता पुन: स्थापना गरे । उनले झन्डै २५ यार्ड टाढाबाट गरेको फ्रिकिक प्रहार सिधै गोलमा परिणत भएको थियो ।

इन्ज्युरी समयमा आर्मीले बराबरी गर्न सुवर्ण अवसर पाएको थियो । जगजित श्रेष्ठले पेनाल्टी क्षेत्र भित्रबाट गरेको प्रहार डिफेन्सले रोके । फुस्किएको बल जिलेस्पीले ब्याक पास दिएपछि जगजितको दोस्रो प्रहार सिधै गोलरक्षक देव लिम्बूको हातमा पुग्यो ।