काठमाडौं (हाम्रो खेलकुद) – मछिन्द्र फुटबल क्लबले एएफसी कप छनोटको प्लेअफ अन्तर्गत भुटानको पारो फुटबल क्लब विरुद्ध पहिलो हाफमै ३ गोल गरेको छ ।

खेलको सुरुवातमै पछि परेको अवस्थाबाट पुनरागमन गर्दै मछिन्द्र पहिलो हाफमा ३-१ ले अघि बढेको हो । मछिन्द्रका लागि आयुष घलान, विमल घर्ती मगर र अ‍ोलावाले आफिजले १-१ गोल गरे ।

खेलको छैटौं मिनेटमा पारोले अग्रता लियो । पेनाल्टी क्षेत्रको बायाँ भागबाट यशी दोर्जीले दिएको पासमा काजुअ‍ोको प्रहार गोल भएको थियो । जापानी फरवार्डको प्रहार गोलरक्षक विशाल श्रेष्ठले बचाउने प्रयास गरेपनि उनको हातमा लाग्दै पोस्टभित्र छिर्यो ।

तर मछिन्द्रले पाँच मिनेट नबित्दै खेल बराबरीमा ल्यायो ।१२ अ‍ौं मिनेटमा सर्ट कर्नरपछि आयुषको क्रमलाई विमलले हेडरमार्फत गोलमा परिणत गरे ।

लगत्तै १५ अ‍ौं मिनेटमा विमल र आयुषको सहकार्यमा मछिन्द्रले अग्रता लियो । विमलले पेनाल्टी क्षेत्र भित्रबाट मिलाएको पासमा आयुषले पहिलो टचमा सुन्दर गोल गरे ।

३९ अ‍ौं मिनेटमा मछिन्द्रका लागि अ‍ोलावाले आफिजले गोल थपे । मिडफिल्डमा अ‍ोमोलाजा करीमले बल जितेपछि सुरु भएको काउन्टर अट्याकमा मछिन्द्रले सुन्दर मुभ सिर्जना गरेको थियो । करीमले अन्तिममा दायाँ विंगबाट दिएको क्रसमा आफिजले हेडरमा गोल गरे ।