काठमाडौं (हाम्रो खेलकुद)- इन्डियन प्रिमियर लिगको अर्को सिजनका लागि चेन्नई सुपर किंग्सका कप्तान महेन्द्रसिंह धोनी तथा रोयल च्यालेन्जर्स बेंगलोरका प्रमुख ब्याटरद्वय विराट कोहली र ग्लेन म्याक्सेवलको तलब घट्ने भएको छ ।

मंगलार सबै फ्रेन्चाइज टोलीले मेगा अक्सनअघि टोलीमा कायम रहने बढीमा चार खेलाडीको नाम र पारिश्रमिक सार्वजनिक गर्दा धोनी, कोहली र म्याक्सवेलको तलब घट्ने भएको हो । चेन्नईमा धोनीको पारिश्रमिक एक सिजनको १२ करोड भारु हुने भएको छ । यसअघि धोनीको पारिश्रमिक १५ करोड भारु रहँदै आएको थियो । धोनीले यस सिजनपछि चेन्नई छाड्ने अनुमान गरिएको छ ।

आइपिएलमा सर्वाधिक महँगा खेलाडी विराट कोहलीको मूल्य १५ करोडमा झरेको छ । कोहलीले यसअघि सर्वाधिक तलबस्वरूप सिजनको १७ करोड भारु पारिश्रमिक पाउँदै आएका थिए । ग्लेन म्याक्सवेललाई बेंगलोरले ११ करोड भारुमा पुन: अनुबन्ध गरेको छ । गत सिजन बेंगलोरले म्याक्सवेललाई १४ करोड २५ लाख भारुमा अनुबन्ध गरेको थियो । मोहम्मद सिराजलाई भने बेंगलोरले ७ करोड भारुमा अनुबन्ध गरेको छ ।

चेन्नईका रविन्द्र जडेजाले १६ करोड भारु पाउने भएका छन् । यसअघि जडेजाले ७ करोड भारु पाउँदै आएका थिए । चेन्नईले मोईन अलीलाई ८ करोड र ऋतुराज गयकवाडलाई ६ करोडमा टोलीमा राखेको छ । पन्जाब किंग्सले ओपनर मयंक अग्रवाललाई १२ करोड र अर्शदीप सिंहलाई ४ करोड भारुमा अनुबन्ध गरेको छ । पन्जाबले मयंक र अर्शदीप बाहेक अन्य सबै खेलाडीलाई फुकुवा गरेको छ । निवर्तमान कप्तान लोकेश राहुलले आइपिएलमा आउने नयाँ टोलीको कप्तानी गर्ने भएका छन् ।

मुम्बईमा रोहित शर्माले १६ करोड भारु पाउने भएका छन् । जुन यसअघिको एक सिजनको भन्दा एक करोड बढी हो । मुम्बईले जस्प्रित बुमराहलाई १२ करोड, सूर्यकुमार यादवलाई ८ करोड र काइरन पोलार्डलाई ६ करोड भारुमा अनुबन्ध गरेको छ । बुमराहको तलब ७ करोडबाट १२ करोड पुगेको हो ।

ऋषभ पन्तलाई दिल्लीले १६ करोडमा टोलीमा राखेको छ । यसअघि पन्तको तलब १५ करोड भारु रहँदै आएको थियो । दिल्लीमा अक्षर पटेलले ९ करोड, पृथ्वी शाले ७ करोड ५० लाख र एनरिच नोर्कियाले ६ करोड ५० लाख भारु पाउने भएका छन् ।