काठमाडौं (हाम्रो खेलकुद) – सुपर ओभरमा सुदूरपश्चिमलाई हराउँदै मधेश प्रदेशले वीर गणेशमान सिंह राष्ट्रिय टी-ट्वान्टी च्याम्पिनसीपमा चौथो जित हात पारेको छ।

सुपर ओभरमा सुदूरपश्चिमले मात्र ७ रन बनायो। मधेशले पाँचौ बलमा जित हात पारेको हो। यो हारमा सुदूरपश्चिम एक खेल अगाडि नै लिग चरणबाट बाहिरिएको छ।

माथिल्लो मुलपानी मैदानमा पहिले ब्याटिङ गरेको मधेश प्रदेशले ७ विकेटको नोक्सानीमा १ सय २१ रन बनायो।
रोहन विकेले सर्वाधिक ४६ रन बनाए। कप्तान राहुल मण्डलले २३ रन, अभिषेक तिवारीले नटआउट २१ रन विशाल पटेलले १४ रन बनाए।

उनीहरू बाहेक अन्यले दोहोरो रन छुन सकेनन्। बलिङमा नरेन साउद, हेमन्त धामी र शेर मल्लले २/२ विकेट लिए। नरेनले सबैभन्दा किफायती बलिङ गरे। उनले ४ ओभर बलिङ गरेर मात्र ५ रन खर्चिए।

जवाफमा १ सय २२ रनको लक्ष्य पछ्याएको सुदूरपश्चिमलाई फाइनलको संभावनालाई जिवितै राख्न खेल जित्नुपर्ने दबाब थियो। तर २० ओभरमा ८ विकेट गुमाउँदै १ सय २१ रनमा नै समेटियो। सुदूरपश्चिमका कुनैपनि खेलाडी क्रिजमा टिक्न सकेनन् ।

टप र मोडल अर्डरका ब्याटरको प्रदर्शन कमजोर रहयो। अभिषेक राईले २२ र वसन्त कार्कीले १५ रन जोडे। सातौं क्रमका वसन्त खत्रीले इनिङस सम्हाल्ने कोशिस गरे। अन्तिम ओभरमा सुदूरपश्चिमलाई जितको लागि १४ रन जरूरी थियो। क्रिजमा वसन्त र किरण ठगुन्ना थिए।

किरणले एक छक्का र एक चौका प्रहार गरे। तर पाँचौ बलमा सर्वाधिक ३८ रन जोडेका वसन्त रन आउट भए। अन्तिम बलको सामना गर्न नरेन साउद स्ट्राइकमा आए। अन्तिम बलमा जितको लागि ३ रन जरूरी थियो। नरेनले दुई रन मात्र जोड्न सके र खेल बराबरीमा पुग्यो। बलिङमा रञ्जित कुमारले ३ विकेट लिए।

खेल बराबरीमा सकिएपछि सुपर ओभरबाट खेलको निर्णय भयो। सुपर ओभरमा सुदूरपश्चिमको ब्याटिङ कमजोर रहयो। मात्र ७ रन जोडन सक्यो। जितको लागि मधेशलाई ८ रन बनाउनुपर्ने थियो। जहाँ पाँचौ बलमा नै मधेशले ९ रन जोडेर जित आफ्नो पक्षमा पार्यो।

यो जितमा मधेशले ६ खेलमा ४ जित सहित ८ अंक बनाएको छ। उसले फाइनलमा पुग्ने संभावनालाई जिवितै राखेका छ। मधेश, बागमती र लुम्बिनीको समान ८ अंक बनाएको छ। ५ खेलबाट ४ अंक जोडेको सुदूरपश्चिम भने बाहिरिएको छ।