एजन्सी – श्रीलंकाले वेस्टइन्डिजसँगको दुई टेस्ट खेलको सिरिज क्लिनस्वीप गर्दै आइसिसी विश्व टेस्ट च्याम्पियनसिप २०२१/२३ को अंक तालिकामा शीर्षस्थानमा छ । श्रीलंकाले दोस्रो टेस्ट खेलमा वेस्टइन्डिजलाई १ सय ६४ रनको फराकिलो अन्तरले हराउँदै सिरिजमा क्लिनस्विप गर्यो ।

२ सय ९७ रनको विजयी लक्ष्य पछ्याएको वेस्टइन्डिज दोस्रो इनिङमा ५६.१ ओभरमा १ सय ३२ रनमा अल आउट भयो । वेस्टइन्डिजका नक्रमाह बोनरले १ सय ४३ बलमा ३ चौकासहित सर्वाधिक ४३ रन बनाए । जर्मेन ब्याकवुड ३६, शाई होप १६ र केमार रोच १३ रनमा आउट भए । अन्य ब्याटरले दोहोरो अंकमा रन बनाउन सकेनन् । श्रीलंका लसिथ एम्बुल्डेनिया र रमेश मेन्डिसले ५–५ विकेट लिए ।

दोस्रो इनिङमा श्रीलंकाले ३४५/९ को अवस्थामा इनिङ्स समाप्तिको घोषणा गर्यो । पहिलो इनिङमा ४९ रनले पछि परेको श्रीलंकाले समग्रमा २ सय ५२ रनको अग्रता लिएको थियो । श्रीलंका धनन्जय डि सिल्भाले २ सय ६२ बलमा ११ चौका र २ छक्कासहित १ सय ५५ रनमा अविजित रहे । पाथुम निसांका १ सय ५४ बलमा ४ चौकासहित ६६ रन जोडे । अन्य ब्याटरले राम्रो प्रदर्शन गर्न सकेनन् । वेस्टइन्डिज वीरसामी पेर्माउलीले ३ रोश्टन चेशले २ विकेट लिए ।

पहिलो इनिङमा वेस्टइन्डिज २ सय ५३ रनमा अल आउट भयो । वेस्टइन्डिजका ओपनर क्रेग ब्रेथवेटले १ सय ८५ बलमा ९ चौकासहित ७२ रनमा आउट भए । जर्मेन ब्याकवुड ४४, बोनर ३५ र काइल मेयर्सले ३६ रन बनाए । श्रीलंका स्पिनर रमेश मेन्डिसले ६ विकेट लिए । श्रीलंका पहिलो इनिङमा २ सय ४ रनमा अल आउट भएको थियो । श्रीलंका पाथुम निसांकाले १ सय ४८ बलमा ५ चौका र १ छक्कासहित ७३ रनको योगदान दिए । दिमुथ करुणारत्ने ४२, ओशदा फर्नान्डो १८ र एन्जिलो म्याथ्युजले ४२ रन बनाए । वेस्टइन्डिजका पेर्माउलीले सर्वाधिक ५ विकेट लिए ।

श्रीलंका पहिलो खेलमा १ सय ८७ रनले विजयी भएको थियो । धनन्जय डि सिल्भा प्लेयर अफ द म्याच र रमेश मेन्डिस प्लेयर अफ द सिरिज चुनिए । श्रीलंका आइसिसी विश्व टेस्ट च्याम्पियन्ससिपमा दुई खेलमा शतप्रतिशत जितका साथ शीर्षस्थानमा छ । पाकिस्तान २ मा जित र १ मा हार सहित ६६.६६ जित प्रतिशतका साथ दोस्रो स्थानमा छ । भारत २ जित, १ हार र २ बराबरीका साथ तेस्रो स्थानमा छ ।