काठमाडौं (हाम्रो खेलकुद) – लुम्बिनी प्रदेशका कप्तान देव खनालले यू–१९ राष्ट्रिय क्रिकेट प्रतियोगितामा सुदूरपश्चिम प्रदेशविरुद्ध अर्धशतक प्रहार गरेका छन् ।

टियु क्रिकेट मैदानमा टस हारेर पहिला ब्याटिङ थालेको लुम्बिनीले २२ ओभरमा ३ विकेट गुमाउँदै १ रन बनाएको छ । कप्तान देव खनालले आफ्नो उच्च लयलाई निरन्तरता दिँदै ७२ बलमा ५ चौका र २ छक्का सहित ५१ रनमा अविजित छन् । जारी प्रतियोगितामा देवको चौथो अर्धशतक हो । देवले ७० बलमा अर्धशतक पूरा गरेका थिए । देवले प्रदेश २ विरुद्ध ६२, बागमतीविरुद्ध ६७ र सुदूरपश्चिमविरुद्ध ९२ रनको इनिङ खेलेका थिए ।

तीव्र गतिका बलर आकाश चन्दको १७ औं ओभरको अन्तिम बाउन्सर बलमा वैकल्पिक फिल्डर कैलाश ऐरीले कभरमा देव खनालको ४१ रनमा क्याच छाडेका थिए । तीव्र गतिका बलर हेमन्त धामीले पहिलो ओभरको दोस्रो बलमै ओपनर शून्यमा आउट भएका थिए । तर त्यसपछि दोस्रो विकेटका लागि विकेटकिपर प्रज्वल थापा र देवले ७८ रनको राम्रो साझेदारी गर्दै अघि बढाए ।

प्रज्वल ५३ बलमा ३ चौका र १ छक्का सहित २४ रनमा क्याच आउट भए । आकाशको १९ औं ओभरको अन्तिम बलमा थर्डमा नरेन्द्र साउदबाट क्याच भएका थिए । स्पिनर शेर मल्लको बलमा विराट भण्डारी विकेटकिपर अर्जुन साउदबाट क्याच हुँदै गोल्डेन डक पेभेलिएन फर्के ।

लुम्बिनी लिगमा ६ खेलमा ५ मा जित र १ मा हार सहित १० अंकका साथ शीर्ष स्थानमा रहेर फाइनल खेलेको हो । सुदूर ६ खेलमा ४ मा जित र २ हार सहित ८ अंकका साथ दोस्रो स्थानमा रहँदै फाइनल खेलेको हो । लिगमा सुदूर लुम्बिनीसँग १ विकेटले पराजित भएको थियो ।