काठमाडौं (हाम्रो खेलकुद) – तीव्र गतिका बलर दुर्गेश गुप्ता र मोहम्मद हसनको उत्कृष्ट बलिङसँगै यू–१९ राष्ट्रिय क्रिकेट प्रतियोगिता फाइनलमा सुदूरपश्चिम प्रदेश लुम्बिनीसँग खराब ब्याटिङ गरेको छ ।

२ सय १३ रनको विजयी लक्ष्य पछ्याएको सुदूरपश्चिम १६ ओभरमा ५ विकेट गुमाउँदै ५१ रन बनाएको छ । तीव्र गतिका बलर दुर्गेश गुप्ताको पाँचौं ओभरको पाँचौं बलमा नरेन भट्टलाई दुई रनमा विकेटकिपर प्रज्वल थापाबाट क्याच गराउँदै पहिलो सफलता दिलाए । नरेन एज लागेर आउट भए । सातौं ओभरको अन्तिम बलमा राहुल भण्डारीलाई गुप्ताले एक रनमा एलबीडब्लू आउट गरे ।

१२ औं ओभरमा मोम्मद हसनले दुई विकेट लिएपछि सुदूर समस्यामा परेको हो । दोस्रो बलमा बसन्त कार्की ७ रनमा बोल्ड आउट भए । दुई बलपछि इन स्वींग बलमा खडक बहादुर बोहरा २१ रनमा एलबीडब्लू आउट भए । दुर्गेशलेनै प्रमुख ब्याटर अर्जुन साउदलाई ९ रनमा एलबीडब्लू आउट भएपछि सुदूर ठूलो समस्यामा छ । क्रिजमा लोकेश बम ५ र नारायण जोशी १ रनमा क्रिजमा छन् । चोभार एण्डबाट दुर्गेश र टियु एण्डबाट हसनले सुदूरपश्चिमको इनिङ धरासय बनाएका छन् ।

त्यसअघि टियु क्रिकेट मैदानमा टस हारेर ब्याटिङ थालेको लुम्बिनीले निर्धारित ५० ओभरमा २ सय १२ रनमा अल आउट भयो । कप्तान देव खनालले ९५ बलमा ५ चौका र ४ छक्कासहित सर्वाधिक ७० रनको योगदान दिए । विशालले ६९ बलमा ४ चौका र २ छक्का सहित ५१ रन जोडे । सुदूरपश्चिमका आकाश चन्दले १० ओभरमा ४७ रन खर्चेर सर्वाधिक ३ विकेट लिए । स्पिनर शेर मल्लले १० ओभरमा १ मेडन सहित १७ रन खर्चेर २ विकेट लिए । हेमन्त धामीले १० ओभरमा २ मेडन सहित ३७ रन खर्चेर २ विकेट लिए ।