काठमाडौं (हाम्रो खेलकुद) – पाँचौं संस्करणको प्रधानमन्त्री कप पुरुष राष्ट्रिय एक दिवसिय क्रिकेट प्रतियोगिता र प्रधानमन्त्री कप महिला टि२० राष्ट्रिय प्रतियोगिता मिति परिवर्तन भएको छ ।

नेपाल क्रिकेट संघ (क्यान) ले यसअघि प्रधानमन्त्री कप पुरुष प्रतियोगिता पुष १२ देखि २५ सम्म हुने जनाएपनि विभिन्न कारण पुष २५ देखि माघ ७ सम्म हुने भएको छ । प्रधानमन्त्री कप महिला टि२० प्रतियोगिता मंसिर २७ देखि पुष ७ गतेसम्म आयोजना गर्ने भनेपनि नयाँ मिति पुष ३ देखि ११ मा हुनेछ । महिला टि२० प्रतियोगिता धनगढीको फाप्ला क्रिकेट मैदानमा हुनेछ । प्रधानमन्त्री कप पुरुष काठमाडौंको टियु र मुलपानी क्रिकेट मैदानमा आयोजना हुनेछ । सबै जिल्लाहरुले जिल्ला छनोट सुरु गरि सकेका छन् ।

प्रधानमन्त्री कप पुरुषमा ७ प्रदेशसँगै तीन विभागीय टोली हुनेछन् । क्यानले यस संस्करण देखि प्रधानमन्त्री लिगमा गर्ने मनासय बनाएको बुझिएको छ । यसअघि १० टोलीलाई दुई समूहमा विभाजन गरि प्रतिस्पर्धा हुँदै आएको छ । प्रधानमन्त्री कप महिलामा भने ७ प्रदेश र एक विभागीय टोली गरि ८ टोलीबीच प्रतिस्पर्धा हुनेछ ।

पहिलो संस्करणको फाइनल वर्षाको कारण प्रभावित हुँदा उपाधि नेपाल आर्मी र नेपाल पुलिस क्लबले संयुक्त रुपमा बाँडेका थिए । दोस्रो संस्करण २०१८ को फाइनलमा एपिएफले आर्मीलाई ६ विकेटले हराउँदै उपाधि जितेको थियो । तेस्रो संस्करण २०१९ मा पुलिसले आर्मीलाई ४ विकेटले हराउँदै उपाधि जितेको थियो ।

चौथो संस्करणको फाइनलमा आर्मीले एपिएफलाई ३३ रनले हराउँदै उपाधि जितेको थियो । गत वर्ष प्रधानमन्त्री कप महिला टि२० प्रतियोगिता फाइनलमा प्रदेश १ ले एपिएफलाई ६ रनले हराउँदै उपाधि जितेको थियो ।