बर्दिया (हाम्रो खेलकुद) – दोस्रो संस्करणको बर्दिया प्रिमियर लिगको उपाधि हिमालयन क्रिकेट एकेडेमी काठमाडौंले जितेको छ । मंगलबार फाइनलमा हिमालयनले स्टार क्रिकेट एकेडेमीलाई १५ रनले पराजित गर्दै उपाधि जितेको हो ।

गुलरियाको कबर्डहल खेल मैदानमा टस जितेर ब्याटिङ थालेको हिमालयनले निर्धारित २० ओभरमा ७ विकेट गुमाउँदै १ सय ४५ रन बनाएको थियो । हिमालयनका लागि मध्यक्रमका ब्याटर पुरण बि.केले ४४ बलमा ३ छक्कासहित सर्वाधिक ५० रनको योगदान दिए । आयुष्मान बमले २१ बलमा ४ चौका प्रहार गर्दै २५ रन बनाए। कप्तान दीपक बोहरा ९ रनमा आउट भए ।

स्टारका लेग स्पिनर सुरज खड्काले ३ ओभरमा १८ रन खर्चिएर २ विकेट लिए । रुपेश बँस्याल र पुरु भटराईले १-१ विकेट लिए । १ सय ४६ रनको विजयी लक्ष्य पछ्याएको स्टारले २० ओभरमा ९ विकेट गुमाउँदै १ सय ३० रन मात्र बनाउन सक्यो । स्टारका कप्तान विशाल खत्रीले ३८ बलमा ५ चौका र १ छक्कासहित सर्वाधिक ४५ रन र नन्दन यादवले ३७ बलमा २९ रनको योगदान दिए ।

खराब सुरुवात गर्नेक्रममा स्टारले पहिलो पावर प्लेमा अर्थात सुरुवाती ६ ओभरमै ३० रन बनाउन प्रमुख चार विकेट गुमाएपछि जित कठिन बनेको थियो । पाँचौं विकेटका लागि नन्दन यादव र कप्तान विशाल खत्रीले ६८ रनको साझेदारी गर्दै खेललाई अन्तिम सम्म लगेका थिए ।हिमालयनका मध्य गतिका बलर कौशल रुपाखेतीले ४ ओभरमा ४२ रन खर्चेर ४ विकेट लिए । दीपक चन्दले ४ ओभरमा २७ रन खर्चिएर ३ विकेट लिए । सागर भण्डारीले २ विकेट लिए

विजेता हिमालयनले १ लाख ११ हजार १ सय ११ रुपैयाँ र उपविजेता स्टारले ५१ हजार १ सय ११ रुपैयाँ प्राप्त गरे । प्रतियोगिता सर्वोत्कृष्ट खेलाडी हिमालयनका आयुष्मान बम भए। हिमालयनलाई उपाधि जिताउन उनले प्रतियोगिताभर उत्कृष्ट प्रदर्शन गरे । उनले प्रतियोगितामा १ सय ५६ रन बनाएका थिए । प्रतियोगिताका उत्कृष्ट बलर नेशनल क्रिकेट एकेडेमीका विशाल पौडेल चुनिए । पौडेलले प्रतियोगिताभर १२ ओभरमा ७४ रन खर्चिएर १० विकेट लिए । स्टारका मनिष थापा प्रतियोगिता उत्कृष्ट ब्याटर चुनिए । मनिषले ५ खेलमा १ सय २९ रन बनाएका थिए । सर्वोत्कृष्ट खेलाडीले रु १० हजार प्राप्त गरे । उत्कृष्ट ब्याटर र बलरले ५(५ हजार प्राप्त गरे ।

आठ टोलीलाई दुई समूहमा विभाजन गरिको थियो । समूह ए मा बर्दिया क्रिकेट एकेडेमी, रोयल किंग्स, स्टार क्रिकेट एकेडेमी र बाँके ११ थिए । समूह बी मा धनगढी क्रिकेट एकेडेमी, हिमालयन क्रिकेट एकेडेमी, नेशनल क्रिकेट एकेडेमी र महेन्द्रनगर क्रिकेट एकेडेमी थिए । हरेक समूहका शीर्ष दुई दुई टोली सेमिफाइनल खेलेका थिए ।

प्रतियोगितामा देशभरका आठ टोलीको सहभागिता थियो । नयाँ शिरा युवा क्लबको आयोजनामा दोस्रो पटक बर्दिया प्रिमियर लिग आयोजना भएको थियो। प्रतियोगिता मुख्य प्रायोजक कृष्णसार रिसोर्ट थियो ।