एजेन्सी – अष्ट्रेलियामा हुने आइसिसी टि२० विश्वकप २०२२ को ग्लोबल छनोटमा नेपालले समूह ए मा प्रतिस्पर्धा गर्ने भएको छ ।

टि२० विश्वकपको ग्लोबल छनोट अन्तर्गत समूह ए को खेल सन् २०२२ फेब्रुअरी १५ देखि २५ सम्म ओमानमा आयोजना हुनेछ । समूह ए मा नेपालसँगै आयरल्यान्ड, ओमान, युएई, फिलिपिन्स, जमर्नी, क्यानडा र बहराइन छन् । समूहको शीर्ष दुई टोलीले अष्ट्रेलियामा हुने टि२० विश्वकपमा स्थान पक्का गर्नेछन् ।

ग्लोबल छनोटको समूह बी का खेल जिम्बावेमा हुनेछन् । समूह बी मा जिम्बावे, हङकङ, नेदरल्यान्ड्स, जर्सी, पपुवा न्युगिनी, सिंगापुर, युगान्डा र अमेरिका छन् । टि२० ग्लोबल छनोट बी जुलाई ८ देखि १८ सम्म जिम्बावेमा हुनेछ ।

ग्लोबल छनोटबाट दुवै समूहका शीर्ष २-२ टोली टि२० विश्वकपमा पुग्नेछन् । अष्ट्रेलिया, इंग्ल्यान्ड, पाकिस्तान, भारत, न्युजिल्यान्ड, दक्षिण अफ्रिका, अफगानिस्तान र बंगलादेशले भने विश्वकपको सुपर १२ मा स्थान पक्का गरेका छन् । आइसिसी टि२० वरीयतामा शीर्ष ८ मा रहेका यी टोली सोझै सुपर १२ मा पुगेका थिए ।

दुई पटकको च्याम्पियन वेस्टइन्डिज, श्रीलंका, नामिबिया र स्कटल्यान्डले विश्वकपको पहिलो चरणमा स्थान बनाएका छन् । यी टोलीले ग्लोबल छनोटबाट पुगेका टोलीसँग प्रतिस्पर्धा गर्नेछन् । टि२० विश्वकप २०२२ आगामी अक्टोबर-नोभेम्बरमा हुनेछ । २०२४ देखि भने टि२० विश्वकपमा २० टोली हुनेछन् । नेपालले पहिलो तथा एकमात्र विश्वकप २०१४ मा खेलेको थियो ।