काठमाडौं (हाम्रो खेलकुद) – नेपाली क्रिकेट टोलीको मुख्य प्रशिक्षकमा पुबुदु दसानायके फर्किने लगभग निश्चित जस्तै बनेको छ । गत असोजमा अष्ट्रेलियन मुख्य प्रशिक्षक डेभ ह्वाटमोरले राजीनामा दिएपछि रिक्त भएको पदमा नेपाल क्रिकेट संघ (क्यान) ले पुबुदुलाई ल्याउने तयारी गरेको छ ।

नेपाली क्रिकेटका सर्वाधिक सफल प्रशिक्षक मानिने पुबुदुको नाम क्यानले सार्वजनिक गर्ने तयारीमा रहेको स्रोतले जानकारी दिएको छ । क्यानले मुख्य प्रशिक्षकको लागि खुल्ला आवेदन मागेको थियो । नेपाली क्रिकेट टोलीको मुख्य प्रशिक्षक बन्न ६० प्रशिक्षकले आवेदन दिएका थिए । क्यानले उत्कृष्ट १५ जनाको अन्तरवार्ता लिएको थियो ।

क्यानको पहिलो रोजाईमा भारतीय मोन्टी देशाई थिए । तर देशाईसँग सहमति हुन नसकेपछि पुबुदु नेपाली क्रिकेट टोलीको मुख्य प्रशिक्षक बन्ने लगभग निश्चित जस्तै बनेको छ । स्रोतका अनुसार बुधबार राती क्यानले पुबुदुलाई मुख्य प्रशिक्षकमा ल्याउने निर्णय गरेको बुझिएको छ ।

क्यानले मोन्टीलाई ल्याउन प्रस्ताव राखेको थियो । मोन्टीसँग पारिश्रमिकसँगै समय नमिलेको बुझिएको छ । मोन्टीले इन्डियन प्रिमियर लिग (आइपिएल) हेर्ने मनासय बनाएको कारण धेरै समय छुट्टी मागेको बुझिएको छ । मोन्टीले १५ हजार डलर पारिश्रमिक माग राखेका थिए ।

पारिश्रमिकसँगै समयको कुरामा सहमति नमिलेपछि क्यानले दोस्रो रोजाईका पुबुदुलाई ल्याउने निर्णयमा पुगेको बुझिएको छ । अर्कोतर्फ पुबुदु नेपाली खेलाडीसँग राम्रोसँग घुलमिल र जानकार हुँदा पनि उनलाई ल्याउन लागिएको हो । पछिल्लो समय सिनियर टोलीमा रहेको समस्या अन्त्य गर्न पुबुदु उपयुक्त हुने भन्दै क्यानले उनलाई ल्याउने निर्णय गरेको बुझिएको छ ।

श्रीलंका क्रिकेट टोलीका पूर्व खेलाडी समेत रहेका पुबुदु दसानायके नेपाललाई पहिलो पटक टि२० विश्वकप खेलाउने प्रशिक्षक हुन् । पुबुदुलाई नेपाली क्रिकेटका सर्वाधिक सफल प्रशिक्षक समेत भन्ने गरिन्छ । सन् २०११ देखि २०१५ सम्म पुबुदुको प्रशिक्षकमा नेपालले क्रान्तिकारी परिवर्तन गरेको थियो । सन् २०१४ मा नेपालले पहिलो पटक टि२० विश्वकप खेलेको थियो ।

पुबुदुको प्रशिक्षकमा नेपालले डिभिजन ४ देखि ३ सम्म उपाधि जितेको थियो । गत असोजमा भएको एभरेष्ट प्रिमियर लिगमा पुबुदुले भैरहवा ग्ल्याडियटर्सको प्रशिक्षणको रुपमा काम गरेका थिए । २०१५ मा नेपाली क्रिकेटको आन्तरिक किचलोको कारण पुबुदुले प्रशिक्षक छाडेर अमेरिका गएका थिए ।