एजेन्सी – ओपनर तथा कप्तान म्याथ्यु वेडको उत्कृष्ट ब्याटिङको सहयोगमा नेपाली लेगस्पिनर सन्दीप सम्मिलित होबार्ट हरिकेन्सले बिग ब्यास लिग २०२१/२२ को आठौं खेलमा सिड्नी सिक्सर्सलाई २ सय १४ रनको विशाल लक्ष्य दिएको छ ।

सिड्नी क्रिकेट ग्राउन्डमा टस जितेर ब्याटिङ थालेको होबार्टले निर्धारित २० ओभरमा २ विकेट गुमाउँदै २ सय १३ रन बनायो ।
होबार्टका ओपनर म्याथ्यु वेडले ४६ बलमा ९ चौका र ५ छक्कासहित सर्वाधिक ९३ रन बनाए । डार्सी शर्ट ५१ बलमा ७ चौका र ३ छक्का सहित ७३ रनमा अविजित रहे ।

म्याथ्यु वेडले १९ बलमै अर्धशतक प्रहार गर्दै आक्रामक सुरुवात दिलाएका थिए । म्याथ्यु र डार्सीले पहिलो विकेटका लागि ११.२ ओभरमा १ सय ११ रनको उत्कृष्ट शतकीय साझेदारी गर्दै सुरुवात दिलाएका थिए । टम करनको बलमा जोर्डन सिल्कबाट क्याच भएपछि म्याथ्यु शतक बनाउन सात रनले चुकेका थिए ।

दोस्रो विकेटका लागि क्लेव ज्वेल र शर्टले ९२ रनको साझेदारी गरेपछि विशाल योगफलमा पुगेको हो । ज्वेल २३ बलमा ६ चौका र १ छक्कासहित ४२ रनमा आउट भए । सिड्नीका टम करन र क्रिस जोर्डनले १-१ विकेट लिए ।