काठमाडौं (हाम्रो खेलकुद) – नेपाल क्रिकेट संघ (क्यान) ले राष्ट्रिय क्रिकेट टोलीको मुख्य प्रशिक्षकमा पुबुदु दसानायकेलाई नियुक्त गरेको छ । पुबुदुले दोस्रो पटक नेपाली क्रिकेट टोली सम्हाल्नेछन् ।

सन् २०११ देखि २०१५ सम्म पुबुदुको प्रशिक्षकमा नेपालले अन्तर्राष्ट्रिय क्रिकेटमा क्रान्तिकारी परिवर्तन गरेको थियो । पुबुदुको प्रशिक्षणमा नेपालले २०१४ मा ऐतिहासिक टि२० विश्वकप खेलेको थियो । नेपाली क्रिकेटको सर्वाधिक ठूलो सफलता हो । त्यस्तै उनको प्रशिक्षणमा डिभिजन चार र थ्री को उपाधि जितेको थियो ।

पुबुदुले २०१५ को नोभेम्बरमा नेपाली क्रिकेट टोलीको प्रशिक्षक छाडेका थिए । क्यानको आन्तरिक राजनीतिको कारण नेपाल छाडेका थिए ।२०२२ को टि२० विश्वकप पुबुदुको मुख्य चुनौती हुनेछ । २०२३ पछि ओडिआई मान्यतालाई निरन्तरता अर्को चुनौती हो । गत असोजमा मुख्य प्रशिक्षक देभ ह्वाटमोरले छाडेपछि रिक्त रहँदै आएको थियो ।

यसपटक नेपाली टोलीको मुख्य प्रशिक्षक बन्न ६० जनाले आवेदन दिएका थिए । भारतीय मोन्टी देशाईंको उच्च सम्भावना थियो । आवेदनमा पुबुदु भन्दा ठूला र स्तरिय नाम पनि थिए । अन्तिम समयमा क्यानले सोच परिवर्तन गर्दै पुबुदुलाई ल्याउने निर्णय लिएको हो । क्यानले पुबुदुलाईनै ल्याउनु पछाडिको पाँच कारण यस प्रकार छन् ।

५. दीर्घकालिन सोच

पछिल्ला दुवै प्रशिक्षक एक वर्ष पनि टिकेनन् । भारतीय उमेश पटवाल र अष्ट्रेलिया डेभ ह्वाटमोरले ८–८ महिना काम गरेर छाडे । लगातार प्रशिक्षक परिवर्तन हुँदा खेलाडी नै अन्यौलमा पर्नसक्छन् । तर पुबुदु दीर्घकालिन विकल्प हुन् । पुबुदु नेपाल छाडेर बाहिर जाने सम्भावना कम छ । दुई वर्षदेखि राष्ट्रिय टोली नहेरेका पुबुदुलाई नेपालले दीर्घकालिन योजनाका साथ ल्याएको अनुमान गरिएको छ ।

मोन्टी आएको भए धेरै समय टिक्ने थिएनन् । यसै महिनादेखि वेस्टइन्डिजको ब्याटिङ प्रशिक्षकको समय सकिँदै छ । मोन्टी स्तरिय प्रशिक्षक रहेकाले आउँदा ठूला टोलीबाट अफर आउँदा वित्तिक्कै नेपाल छाडेर जाने पक्का थियो । तर पुबुदुलाई अन्य देशबाट अवसर आउने कम छ ।

४. मोन्टीसँग सहमती नहुनु

क्यानको पहिलो रोजाईमा मोन्टी देशाई पहिलो रोजाईमा थिए । वर्तमान समय वेस्टइन्डिजका ब्याटिङ प्रशिक्षक मोन्टी देशाई ल्याउन नेपाल इच्छुक थियो । ब्याटिङ कमजोर हुँदा सुधारको लागि मोन्टी पहिलो रोजाईमा थिए । तर देशाईले इन्डियन प्रिमियर लिग (आइपिएल) मा फ्रेन्चाइज हेर्ने मनासयको कारण धेरै विदा मागेका थिए ।

क्यान धेरै विदा दिन सहमत थिएन । अर्कोतर्फ उनले पारिश्रमिक १५ हजार डलरमाथि माग गरेका थिए । पुबुदुले झण्डै १२ हजार डलरमा जिम्मेवारी सम्हाल्नेछन् । जसले गर्दा पुबुदुलाई ल्याउने निर्णय लिएको हो ।

३. पुबुदुको सफल छवि

नेपाली क्रिकेट इतिहासमा पुबुदु सर्वाधिक सफल प्रशिक्षक हुन् । उनको प्रशिक्षकमा नेपालले २०१४ मा टि२० विश्वकप खेलेको थियो । जुन नेपाली क्रिकेटले हात पारेको सर्वाधिक ठूलो सफलता हो । पुबुदुले आफ्नो प्रशिक्षणमा नेपाली क्रिकेटमा क्रान्तिकारी परिवर्तन ल्याएका थिए । पुबुदुले आफ्नो योजना अनुसार भने काम गर्न पाएका थिएनन् । यस पटक क्यान उनको योजना अनुसार काम गर्ने सोचमा छ । क्यान पुबुदुबाट पहिला जसरीनै सफलता हात पार्न चाहन्छ।

२. नेपाली क्रिकेटबारे राम्रो जानकार

आवेदन दिएका प्रशिक्षकमा नेपाली क्रिकेटबारे पुबुदु सबैभन्दा बढी जानकार प्रशिक्षक थिए । पुबुदु खेलाडी, समर्थक र क्यानका पदाधिकरीसँग क्यान निकै नजिक छन् । नेपाली खेलाडीबारे पुबुदु नजिक हुँदा योजना बनाउन समय हुन्छ । अर्कोतर्फ नयाँ प्रशिक्षक ल्याउँदा खेलाडी र क्रिकेट अवस्था बुझ्नै दुई तीन महिना लाग्न सक्छ ।

नेपालसँग त्यो समय छैन । नेपालले आगमी फेब्रुअरीमा ग्लोबल टि२० छनोट खेल्दैछ । ग्लोबल छनोटको लागि नेपालको तयारी शून्य जस्तै छ । पुबुदु नेपाल आएसँगै नेपाल तीव्र रुपमा काम गर्न चाहन्छ । जसको कारण पुबुदुलाई ल्याउने निर्णय लिएको हो ।

१. टिम एकता कायम

क्यानले पुबुदुलाई ल्याउनुको मुख्य कारण नेपाली क्रिकेट टोलीमा देखिएको गुट उपगुटको अन्त्य हो । पछिल्लो समय यस समस्याले नेपाली क्रिकेट नराम्रोसँग बिग्रिएको छ । सिनियर टोलीकै खेलाडी विभिन्न खेमामा विभाजित छन् । क्रिकेट भनेको नै टिम एकता खेल हो । तर नेपाली क्रिकेटमा त्यो छैन । पछिल्लो समय सिंगापुर, कतार र मलेसिया जस्ता कमजोर देशसँग हार्नुको मुख्य कारण टिम एकताको कमी हो ।

नयाँ प्रशिक्षक ल्याउँदा गुटउपगुट अन्त्य गर्न कठिन पर्छ । त्यसैले नेपाली क्रिकेट राम्रोसँग बुझेको प्रशिक्षक ल्याउन आवश्यक थियो । क्यानको मन नभएपनि पुबुदुनै उत्कृष्ट विकल्प देखेपछि ल्याउने निर्णय लिएको हो ।