एजेन्सी – नेपाली लेगस्पिनर सन्दीप लामिछानेले बिग ब्यास लिग २०२१/२२ को आफ्नो तेस्रो खेलमा पर्थ स्कोचर्सविरुद्ध मध्यम प्रदर्शन गरेका छन् । सन्दीपले आफ्नो स्पेलको पहिलो बलमै विकेट लिनएपनि त्यसपछि उक्त सफलता दोहोराउन सकेनन् । पर्थले होबार्ट हरिकेन्सलाई १ सय ८३ रनको बलियो लक्ष्य दिएको छ ।

टस जितेर पहिला ब्याटिङ थालेको पर्थले निर्धारित २० ओभरमा ५ विकेट गुमाउँदै १ सय ८२ रन बनायो । पर्थका मिचेल मार्श ६० बलमा ६ चौका र ५ छक्कासहित सर्वाधिक एक सय रनको शतकीय इनिङ खेले । मार्शले ६० बलमा शतक प्रहार गरेका थिए । मार्शले २० औं ओभरको पाँचौं बलमा एक रन बटुल्दै शतक पूरा गरे । अघिल्लो महिना अष्ट्रेलियालाई टि२० विश्वकप उपाधि जिताउन उत्कृष्ट प्रदर्शन गरेका मार्शले त्यहिँ लयलाई निरन्तरता दिँदै शतक पूरा गरेका हुन् । लाहिरु इभान्सले २४ बलमा ५ चौका र १ छक्कासहित ४० रन जोडे । अन्य ब्याटरले भने राम्रो प्रदर्शन गर्न सकेनन् ।

होबार्टका नाथन एलिसले ४ ओभरमा ३३ रन खर्चेर २ विकेट लिए । जोइल पेरिस र स्कट बोल्यान्डले एक एक विकेट लिए । सन्दीप लामिछानेले ४ ओभरमा ३२ रन खर्चेर १ विकेट लिए ।

सन्दीपको चार ओभर

होबार्टले सन्दीपलाई छैटौं ओभरमै बलिङमा ल्याएको थियो । सन्दीपले आफ्नो पहिलो बलमै जोश इंग्लिसलाई क्लेव ज्वेलबाट दुई रनमा क्याच गराउँदै विकेट हात पारेका थिए । दोस्रो, तेस्रो, चौथो, पाँचौं र छैटौं बलमा सन्दीपले मिचेल मार्श र एश्टन टर्नरलाई एक एक रन खर्चे ।

आठौं ओभरमा सन्दीपले १० रन खर्चिए । पहिलो र दोस्रो बलमा सन्दीपले एक रन दिए । तेस्रो बल एस्टन टर्नरलाई डट राखेका थिए । चौथो बलमा एक रन खर्चिए । पाँचौं बलमा मार्शले एक रन दिँदै स्ट्राइक टर्नरलाई दिएका थिए । टर्नरले अन्तिम बलमा ओभर मिड विकेटमा छक्का प्रहार गरे ।

१३ औं ओभरमा सन्दीपले ११ रन खर्चिए । पहिलो बलमा मार्श र दोस्रो बलमा लाहिरु इभान्सलाई एक एक रन दिए । तेस्रो बल मार्शलाई डट राखेपनि चौथो बलमा सन्दीपले चौका खाएका थिए । पाँचौं बलमा एक र अन्तिम बलमा चौका प्रहार गरेपछि केहि महँगो सावित भएका थिए ।
१६ औं ओभरमा सन्दीपले सात रन खर्चिए ।

पहिलो बलमै मार्शले सन्दीपलाई सन्दीपलाई चौका प्रहार गरेका थिए । दोस्रो र तेस्रो बलमा सन्दीपले एक एक रन खर्चिए । चौथो र पाँचौं बलमा मार्शलाई डट राखे । अन्तिम बलमा सन्दीपले एक रन खर्चिदै आफ्नो स्पेल सकाए । यसअघि सन्दीपले सिड्नी सिक्सर्ससँग पहिलो खेलमा एक विकेट र दोस्रो खेलमा विहीन बनेका थिए ।