एजेन्सी – घरेलु टोली पाकिस्तानले वेस्टइन्डिजसँगको तीन टि२० आई सिरिज एक खेल अगावै जितेको छ । दोस्रो टि२० आई खेलमा पाकिस्तानले वेस्टइन्डिजमाथि ९ रनको रामोन्चक जित हात पार्दै सिरिज जितेको हो ।

कराँचीमा टस जितेर ब्याटिङ थालेको पाकिस्तानले निर्धारित २० ओभरमा ८ विकेट गुमाउँदै १ सय ७२ रन बनायो । पाकिस्तानका शादब खानले उत्कृष्ट अन्त्य गर्नेक्रममा १२ बलमा १ चौका र ३ छक्कासहित २८ रनमा अविजित रहे । ओपनर मोहम्मद रिजवान ३० बलमा ४ चौका र १ छक्कासहित ३८ रनमा आउट भए । हैदर अली ३४ बलमा ४ चौका प्रहार गर्दै ३१ रनमा आउट भए ।

इफ्तिखर अहमद १९ बलमा १ चौका र २ छक्कासहित ३२, आसिफ अली ९, बाबर आजम ७ र फखार जमान १० रनमा आउट भए ।
वेस्टइन्डिजका ओडेन स्मिथले सर्वाधिक २ विकेट लिए । अकिल हसन, ओशान थोमस, रोमारियो शेफर्ड र हेडन वाल्श जुनियरले १–१ विकेट लिए ।

१ सय ७३ रनको विजयी लक्ष्य पछ्याएको वेस्टइन्डिज २० ओभरमा १ सय ६३ रनमा अल आउट भयो । वेस्टइन्डिजका युवा ओपनर ब्रेन्डन किंगले ४३ बलमा ६ चौका र ३ छक्कासहित सर्वाधिक ६७ रनको योगदान दिएपनि टोलीको हार टार्न सकेनन् । रोमारियो शेफर्ड १९ बलमा २ चौका र २ छक्कासहित ३५ रनमा अविजित रहे । निकोलस पुरन २६ र ओडेन स्मिथ १२ रनमा आउट भए ।

पाकिस्तानका तीव्र गतिका बलर शाहिन शाह अफ्रिदीले ४ ओभरमा २६ रन खर्चेर ३ विकेट लिए । मोहम्मद वासिम जुनियर, मोहम्मद जुनियर र हरिस रौफले २–२ विकेट लिए । पहिलो खेलमा पाकिस्तान ६३ रनले विजयी भएको थियो । तेस्रो खेल बिहीबार हुनेछ ।