एजेन्सी – ओपनर बाबर आजम र मोहम्मद रिजवानको उत्कृष्ट ब्याटिङको सहयोगमा पाकिस्तानले वेस्टइन्डिजसँगको तेस्रो टि२० आई खेलमा ७ विकेटको कीर्तिमानी जित हात पारेको छ । योसँगै तीन टि२० आई सिरिजमा घरेलु टोली पाकिस्तानले क्लिनस्विप गरेको छ ।

जितको लागि २ सय ८ रनको विशाल विजयी लक्ष्य पछ्याएको पाकिस्तानले १८.५ ओभरमा ३ विकेट गुमाउँदै पूरा गर्यो । पाकिस्तानले पूरा गरेको सर्वाधिक ठूलो योगफल हो । यसअघि टि२० आईमा सर्वाधिक ठूलो लक्ष्य यसै वर्ष दक्षिण अफ्रिकाविरुद्ध २ सय ५ रन थियो ।

पाकिस्तानका ओपनर मोहम्मद रिजवान ४५ बलमा १० चौका र ३ छक्कासहित सर्वाधिक ८७ रनको योगदान दिए । योसँगै रिजवान एकै वर्षमा २ हजार टि२० रन बनाउने पहिलो खेलाडी बनेका छन् । कप्तान बाबर आजमले ५३ बलमा ९ चौका र २ छक्कासहित ७९ रन बनाए ।

पहिलो विकेटका लागि बाबर र रिजवानले १५.१ ओभरमा १ सय ५८ रनको उत्कृष्ट शतकीय साझेदारी गरेका थिए । बाबर र रिजवानले छैटौं पटक टि२० आईमा साझेदारी गरेका हुन् । जुन कुनैपनि जोडीले टि२० आईमा गरेको सर्वाधिक शतकीय साझेदारी हो । आसिफ अली ७ बलमा २ चौका र २ छक्कासहित २१ रनको योगदान दिए ।

त्यसअघि कराँचीमा टस जितेर पहिला ब्याटिङ थालेको वेस्टइन्डिजले निर्धारित २० ओभरमा ३ विकेट गुमाउँदै २ सय ७ रन बनाएको थियो । कप्तान निकोलस पुरनले ३७ बलमा २ चौका र ६ छक्कासहित सर्वाधिक ६४ रनको योगदान दिए । ओपनर ब्रेन्डन किंग २१ बलमा ७ चौका र २ छक्कासहित ४३ रनको आक्रामक सुरुवात दिलाएका थिए ।

शम्राह ब्रुक्सले ३१ बलमा २ चौका र ४ छक्कासहित ४९ रन बनाए । डरेन ब्राभो २७ बलमा ३ चौकासहित ३४ रनमा अविजित रहे । पाकिस्तानका मोहम्मद वासिम जुनियरले ४ ओभरमा ४४ रन खर्चेर २ विकेट लिए । शाहनवाज दाहानीले ४ ओभरमा २३ रन खर्चेर १ विकेट लिए । २०२१ मा पाकिस्तानको टि२० आई मा यो २० औं जित हो ।

जुन कुनैपनि टोलीले एकै वर्ष हात पारेको सर्वाधिक धेरै जित हो । पाकिस्तान पहिलो खेलमा ६३ रन र दोस्रो खेलमा ९ रनले विजयी भएको थियो ।