एजेन्सी – एशेज सिरिज अन्तर्गत दोस्रो टेस्ट खेलमा घरेलु टोली अष्ट्रेलिया जिततर्फ अघि बढेको छ । चौथो दिनको खेल सकिँदा अष्ट्रेलिया बलियो अवस्थामा छ । चौथो दिनको खेल सकिँदा ४ सय ६८ रनको विजयी लक्ष्य पछ्याएको इंग्ल्यान्ड ४३.२ ओभरमा ८२–४ को कमजोर अवस्थामा छ ।

इंग्ल्यान्डलाई जितको लागि अन्तिम दिन ३ सय ८६ रन बनाउनु पर्ने हुँदा हातमा ६ विकेट हुनेछ । प्रमुख चार ब्याटर आउट हुँदा इंग्ल्यान्डको लक्ष्य हारबाट बच्ने हुनेछ । ओपनर रोरी बन्र्स ९५ बलमा ५ चौका सहित ३४ रनमा आउट भए । हसिब हमिद शून्य र डेविम मलान २० रनमा आउट भए ।

दिनको खेल सकिन दुई ओभर बाँकी रहँदा कप्तान जो रुटलाई २४ रनमा गुमाएपछि इंग्ल्यान्ड समस्यामा परेको हो । रुट मिचेल स्टार्कको बलमा एलेक्स केरीबाट क्याच आउट भए । क्रिजमा बेन स्टोक्स तीन रनमा अविजित छन् । उनलाई युवा ब्याटर ओली पोपले साथ दिनेछन् ।

अष्ट्रेलियाले २३०-९ को अवस्थामा इनिङ समाप्तिको घोषणा गरेको थियो । पहिलो इनिङमा अष्ट्रेलियाले २ सय ३७ रनको अग्रता लिएको थियो । समग्रमा ४ सय ६७ रनको अग्रता लिएको थियो ।

अष्ट्रेलियाका मार्नस लाबुसेन र ट्रर्विस हेडले ५१-५१ रन बनाए । लाबुसेनले ९६ बलमा ६ चौका प्रहार गरे । हेडले ५४ बलमा ७ चौका प्रहार गरेका थिए । स्टिभ मिस्थ ६ र डेविड वार्नर १३ रनमा आउट भए । युवा अलराउन्डर क्यामरन ग्रिन ४३ बलमा ३३ रनमा अविजित रहे ।

इंग्ल्यान्डका जो रुट, डेविड मलान र ओली रोबिनसनले २-२ विकेट लिए । त्यसअघि इंग्ल्यान्ड पहिलो इनिङमा ८४.१ ओभरमा २ सय ३६ रनमा अल आउट भएको थियो । इंग्ल्यान्डका डेविड मलानले १ सय ५७ बलमा १० चौका सहित सर्वाधिक ८० रनको योगदान दिए । कप्तान जो रुट १ सय १६ बलमा ७ चौका प्रहार गर्दै ६२ रन बनाए ।

एक समय १२–२ को कमजोर अवस्थामा पुगेको इंग्ल्यान्डलाई तेस्रो विकेटका लागि मलान र रुटले १ सय ३८ रनको शतकीय साझेदारी गर्दै राम्रो पूनरागमन गराएका थिए । रुटलाई क्यामरन ग्रिनले स्टिभ स्मिथबाट क्याच गराएपछि अष्ट्रेलियाले खेलमा उत्कृष्ट पूनरागमन गरेको थियो । रुट आउट नहुनुअघि १५०–२ को बलियो अवस्थामा पुगेको इंग्ल्यान्डले बाँकी ८६ रन जोड्न ८ विकेट गुमाएपछि विशाल रनले पछि परेको थियो ।

बेन स्टोक्सले ९८ बलमा ३ चौका र १ छक्का प्रहार ३४ रन बनाए । क्रिस वोक्सले ४० बलमा ५ चौकासहित २४ रन बनाए । अष्ट्रेलियाका मिचेल स्टार्कले सर्वाधिक ४ विकेट लिए । नाथन लायनले ३, क्यामरन ग्रिनले २ र माइकल नेसरले १ विकेट लिए ।

एडिलेड ओभलमा टस जितेर पहिला ब्याटिङ थालेको अष्ट्रेलियाले पहिलो इनिङमा दोस्रो दिन अन्तिम सेसनमा १५०.४ ओभरमा ४७३–९ को अवस्थामा इनिङ समाप्तिको घोषणा गर्यो । अष्ट्रेलियाका मार्नस लाबुसेनले ३ सय ५ बलमा ८ चौकासहित सर्वाधिक १ सय ३ रनको शतकीय इनिङ खेले ।

लाबुसेनको टेस्ट करिअरको छैटौं शतक हो । डेविड वार्नर १ सय ६७ बलमा ११ चौका सहित ९५ रनमा आउट भए । कप्तान स्टिभ स्मिथले २ सय १ बलमा १२ चौका र १ छक्कासहित ९३ रनको योगदान दिए । ओपनर मार्नस हरिस तीन रनमै आउट भएका थिए । दोस्रो विकेटका लागि लाबुसेन र वार्नरले १ सय ७२ रनको उत्कृष्ट शतकीय साझेदारी गरेका थिए । बेन स्टोक्सको बलमा स्टुअर्ट ब्रोडबाट क्याच भएपछि वार्नर शतक बनाउन पाँच रनले चुकेका थिए ।

लाबुसेनलाई ओली रोविन्सनले एलबीडब्लू आउट गरेका थिए । जेम्श एन्डरसनले एलबीडब्लू आउट गरेपछि स्मिथ शतक बनाउन सात रनले चुकेका थिए । विकेटकिपर एलेक्स केरीले १ सय ७ बलमा ५ चौका प्रहार गर्दै ५१ रनमा आउट भए । मिचेल स्टार्क ३९ बलमा ५ चौकासहित ३९ रनमा अविजित रहे ।

तल्लोक्रमका बलर माइकल नेसरले डेब्यू खेलमा २४ बलमा ५ चौका र १ छक्का प्रहार गर्दै ३५ रनमा आउट भए । इंग्ल्यान्डका बेन स्टोक्सले सर्वाधिक तीन विकेट लिए । जेम्श एन्डरसनले दुई, स्टुअर्ट ब्रोड, क्रिस वोक्स, ओली रोविन्सन र जो रुटले एक एक विकेट लिए । पाँच टेस्टको एशेज सिरिजमा अष्ट्रेलियाले १–० को अग्रता लिएको छ । पहिलो खेलमा अष्ट्रेलिया ९ विकेटले विजयी भएको थियो ।