काठमाडौं(हाम्रो खेलकुद) – नेपाली क्रिकेट समर्थक समाज ( एनसिएसएस) ले नेपाली महिला क्रिकेट टोलीकी सदस्य कविता गौतमलाई ८० हजार रुपैयाँ हस्तान्तरण गरेको छ ।

कविताको दुखाइ समर्थकको मल्हम अभियानबाट संकलन भएको ८० हजार रकम आइतबार एनसिएसएसले हस्तान्तरण गरेको हो । उपचारको क्रममा काठमाडौंमा रहेकी कवितालाई एनसिएसएसका अध्यक्ष नारायण पराजुलीले उक्त रकम हस्तान्तरण गरेका थिए । कविताले सहयोग गर्ने सम्पूर्णलाई समर्थललाई धन्यवाद ब्यक्त गरिन् ।

गत चैतमा काठमाडौंमा भएको ललितपुर मेयर्स वुमन्स टि२० च्याम्पियन्सिप ललितपुरबाट खेल्नेक्रममा कविताको बायाँ खुट्टामा चोट लागेको थियो । सुदूरपश्चिमविरुद्ध ललितपुर ११ बाट कविताले फिल्डिङ गर्नेक्रममा खुट्टामा चोट लागेको थियो । उक्त खुट्टा उपचारको लागि पर्याप्त आर्थिक अवस्था नभएको कथा बाहिरिएपछि एनसिएसएसले अभियान चलाएको थियो।

वुमन्स च्याम्पियन्स लिग ९डब्लूसीएल० २०१९ मा मा चितवन राइनोजलाई कविताले उपाधि जिताउन ५ खेलमा १० विकेट लिदै उत्कृष्ट बलर चुनिइन् । १३ औं दक्षिण एसियाली खेलकुदका लागि राष्ट्रिय टोलीको छनोटमा परेकी थिइन् । तर त्यसबेला पारिवारिक कारणले उनी छनोटमा सहभागी हुन पाइनन् ।

कविता सन् २०१२ मा कुवेतमा भएको एसीसी यू१९ वुमन्स च्याम्पियन्स मा नेपालले उपाधि जित्दा टोलीको उप कप्तान थिइन् । रुविना क्षेत्रीको कप्तानीमा नेपालले उत्कृष्ट प्रदर्शन गर्दा कविताले प्रभावशाली प्रदर्शन गरिन् । त्यसै प्रदर्शनलाई निरन्तरता दिँदै कविताले सन् २०१४ मा थाइल्यान्ड नेपालको सिनियर टोलीबाट कविताले खेलेकी थिइन् । त्यसबेला उनले चीन र हङकङसँग मैदान उत्रने अवसर पाएकी थिइन् ।