काठमाडौं(हाम्रो खेलकुद) – नेपाली यू-१९ टोलीका विकेटकिपर अर्जुन साउदले एसिसी यू-१९ एसिया कपमा श्रीलंकाविरुद्ध अर्धशतक प्रहार गरेका छन् ।

३ सय २३ रनको विशाल विजयी लक्ष्य पछ्याएको नेपालले ३९ ओभरमा ५ विकेट गुमाउँदै १ सय ८६ रन बनाएको छ । अर्जुन साउद ७८ बलमा ३ चौका र २ छक्का सहित ६२ रनमा अविजित छन् । जारी यू-१९ एसिया कपमा नेपालबाट अर्धशतक प्रहार गर्ने अर्जुन पहिलो खेलाडी हुन् । अर्जुनले ७३ बलमा अर्धशतक पूरा गरेका थिए ।

कप्तान देव खनाल ४५ बलमा ४ चौकासहित २८ रनमा क्याच आउट भए । ओपनर सन्तोष कार्की ३४ बलमा ४ चौका र १ छक्कासहित ३४ रन जोड्दै आउट भए । ओपनर देव खनाल र सन्तोष कार्कीले ११ ओभरमा ५९ रनको साझेदारी गर्दै राम्रो सुरुवात दिलाएका थिए । सन्तोष माथिशा पाथिरानाको बलमा बोल्ड आउट हुन पुगेका थिए । १७ औं ओभरको तेस्रो बलमा देवलाई रविन डि सिल्भाले सदिशा राजपक्षेबाट क्याच आउट गराए ।

डि सिल्भाले नै २१ औं ओभरको तेस्रो बलमा वसन्त कार्कीलाई १ रनमा क्याच आउट गराए । रविन डि सिल्भाको बलमै विवेक रानामगर २ रनमा आउट भएका थिए । तर पाँचौं विकेटका लागि अर्जुन साउद र बशिर अहमदले ८७ बलमा ७५ रनको साझेदारी गर्दै नेपालको इनिङ उकासेका थिए । बशिर शेभन डेनियलको ३६ औं ओभरको पाँचौं बलमा सहान कुमाराबाट ४३ रनमा क्याच आउट भए । उनले ५१ बलमा ३ चौका र २ छक्का प्रहार गरे ।

त्यसअघि शारजाह क्रिकेट मैदानमा टस जितेर पहिला ब्याटिङ थालेको श्रीलंकाले निर्धारित ५० ओभरमा ४ विकेट गुमाउँदै ३ सय २२ रन बनाएको थियो । श्रीलंकाका तेस्रो नम्बरका ब्याटर सदिशा राजपक्षेले १ सय १९ बलमा ११ चौका र २ छक्का सहित १ सय ३१ रनको उत्कृष्ट शतकीय इनिङ खेले ।

ओपनर चामिन्दु विक्रमसिंघे १ सय २६ बलमा ८ चौका र २ सहित १ सय ११ रनको शतकीय इनिङ खेले । दोस्रो विकेटका लागि चामिन्दु र सदिशाले १ सय ९७ बलमा २ सय २३ रनको उत्कृष्ट दोहोरो शतकीय साझेदारी गरेपछि नेपाली बलर श्रीलंका ब्याटर सामू निरीह बनेका थिए । नेपालका मोहम्मद आदिल अन्सारीले ९ ओभरमा ४६ रन खर्चेर २ विकेट लिए ।