एजेन्सी – नेपाली क्रिकेट टोलीका कप्तान तथा लेगस्पिनर सन्दीप लामिछानेले बिग ब्यास लिग २०२१/२२ को २२ औं खेलमा एडिलेड स्ट्राइकर्सविरुद्ध खराब प्रदर्शन गरेका छन् । एडिलेडले होबार्टलाई १ सय ७६ रनको विजयी लक्ष्य दिएको छ ।

टस जितेर पहिला ब्याटिङ थालेको एडिलेडले २० ओभरमा ५ विकेट गुमाउँदै १ सय ७५ रन बनाएका छन् । म्याट रेनशाले ४१ बलमा ९ चौका सहित ६३ रन बनाए । जेक वेदरल्डले ४३ बलमा ६ चौका प्रहार गर्दै ५१ रन बनाए । थोमस केलीले १८ बलमा १ चौका र १ छक्कासहित २८ रनमा आउट भए ।

सन्दीपले ३ ओभरमा ३१ रन खर्चेपनि विकेट लिन सकेनन् । होबार्टका राइली मेरिडिथले ४ ओभरमा ३७ रन खर्चेर ३ विकेट लिए । खराब बलिङपछि होबार्टले पुरै स्पेल बलिङ दिएको थिएन । सन्दीप लगातार तेस्रो खेलमा विकेट विहीन बनेका हुन् ।

यस्तो रह्यो सन्दीपको चार ओभर

सन्दीपले आफ्नो पहिलो ओभरमै तीन चौकासहित १४ रन खर्चिदै खराब सुरुवात गरेका थिए । छैटौं ओभरको पहिलो र दोस्रो बलमा रेनशाले सन्दीपलाई लगातार चौका प्रहार गरे । तेस्रो बलमा एक रन खर्चिदा चौथो बलमा चौका खर्चिएपछि महँगो बनेका थिए । वेदरल्डले फाइन लेगमा सन्दीपलाई चौका प्रहार गरेका थिए । पाँचौं बलमा डट र अन्तिम बलमा एक रन खर्चिए ।

त्यसपछि होबार्टले सन्दीपलाई १२ औं ओभरमा बलिङमा ल्याएको थियो । १२ औं ओभरको पहिलो बलमा रेनशाले चौका प्रहार गरे । दोस्रो बलमा डट र तेस्रो बलमा एक रन लिए । चौथो, पाँचौं र छैटौं बलमा एक एक रन खर्चिए । सन्दीपले १७ औं ओभरमा ९ रन खर्चिए । पहिलो बल थोमस केलीलाई डट राखेका थिए । दोस्रो बलमा एक रन खर्चिए । तेस्रो बलमा जोनाथन वेल्सले दुई र चौथो बलमा चौका प्रहार गरे । पाँचौं र छैटौं बलमा एक एक रन खर्चिए ।

जारी बिग ब्यासमा सन्दीप ६ खेल मध्य चौथो खेलमा विकेट विहीन बनेका हुन् । सन्दीप लगातार तेस्रो खेलमा विकेट विहीन बनेका हुन् । सन्दीप नेपाली टोलीको कप्तान बनेपछि बिग ब्यासका तीन खेल खेलेका छन् । तीनै खेलमा सन्दीप विकेट विहीन बनेका हुन् । यसअघि मेलबर्न स्टार्ससँग ४ ओभरमा ३२ र पर्थ स्कोचर्ससँग ४ ओभरमा ३९ रन खर्चेका थिए ।

पहिलो खेलमा सिड्नी सिक्सर्ससँग १ विकेट लिएका थिए । सन्दीप दोस्रो खेलमा सिक्सर्ससँगनै विकेट विहीन बनेका थिए । तेस्रो खेलमा पर्थ स्कोचर्ससँग १ विकेट लिएका थिए । चौथो खेलमा पर्थ स्कोचर्सविरुद्ध ४ ओभरमा ३९ रन खर्चेपनि विकेट लिन सकेका थिएनन् । समग्रमा सन्दीपले जारी बिग ब्यासमा ६ खेलमा २३ ओभर बलिङ गर्दै १ सय ८२ रन खर्चेर २ विकेट लिएका हुन् ।