काठमाडौं (हाम्रो खेलकुद) – मध्यक्रमका ब्याटर विवेक रानामगर र अलराउन्डर बशिर अहमदको अर्धशतकमा नेपालले एसिसी यू–१९ एसिया कपमा अन्तिम खेलमा कुवेतलाई २ सय ४० रनको चुनौतीपूर्ण लक्ष्य दिएको छ ।

शारजाहमा टस हारेर ब्याटिङ थालेको नेपाल ४२.३ ओभरमा २ सय ३९ रनमा अल आउट भयो । नेपालका स्पिन अलराउन्डर बशिर अहमदले ६१ बलमा ७ चौका र १ छक्कासहित सर्वाधिक ५६ रनको अर्धशतकीय इनिङ खेले । विवेक रानामगरले ७१ बलमा ६ चौकासहित ५० रनको योगदान दिए ।

एक समय ४.३ ओभरमा २७–३ को कमजोर अवस्थामा पुगेको नेपाललाई चौथो विकेटका लागि विवेक रानामगर र बशिर अहमदले १ सय १५ बलमा ९२ रनको साझेदारी गर्दै इनिङ उकासेका थिए । आदिल अन्सारीले आक्रामक ब्याटिङ गर्दै ४२ बलमा २ चौका र ५ छक्कासहित ४९ रनमा आउट भए ।

कुवेतका तीव्र गतिका बलर मिर्जा अहमदले शीर्षक्रमका तीन ब्याटरलाई आउट गरेपछि पावर प्लेमै नेपाल धरासय बनेको थियो । पहिलो ओभरको पाँचौं बलमा अहमदले सन्तोष कार्कीलाई मिट भाभ्सरबाट ५ रनमा क्याच गराउँदै पहिलो सफलता दिलाए ।

तेस्रो ओभरको दोस्रो बलमा कप्तान देव खनाललाई ५ रनमा बोल्ड आउट गरे । विवेकटकिपर अर्जुन साउदलाई मिर्जाले १० रनमा बोल्ड गर्दा नेपाल ४.३ ओभरमा २७–३ को अवस्थामा पुगेको थियो । त्यसपछि विवेक रानामगर, बशिर र आदिल अन्सारीले इनिङ उकासेका थिए ।
विवेक यादव शून्य र गुलशन झा ७ रनमा आउट भए । तल्लोक्रमका आठौं विकेटका लागि आदिल र शेर मल्लले ६० बलमा ५९ रनको महत्वपूर्ण साझेदारी गरेका थिए । शेर २६ बलमा ३ चौकासहित २१ रनमा आउट भए । दीपेश कँडेलले २१ बलमा २ चौका र १ छक्कासहित १५ रनको योगदान दिए ।

कुवेतका मिर्जा अहमदले ५ ओभरमा २२ रन खर्चेर ३ विकेट लिए । अब्दुल सदिकले ७.३ ओभरमा ४२ रन खर्चेर ३ विकेट लिए । हेनरी थोमसले १० ओभरमा १ मेडनसहित ३६ रन खर्चेर २ विकेट लिए । मोहम्मद बास्तकीले ५ ओभरमा ४५ रन खर्चेर २ विकेट लिए ।