काठमाडौं (हाम्रो खेलकुद) – एसिसी यू–१९ एसिया कपमा नेपालले कुवेतविरुद्ध बलिङमा खराब प्रदर्शन गरेको छ । शारजाहमा जारी खेलमा नेपालले प्रस्तुत गरेको २ सय ४० रनको विजयी लक्ष्य पछ्याएको कुवेतले सुरुवाती १२ ओभरमा कुनै विकेट नगुमाउँदै ८० रन बनाएको छ ।

कुवेतका कप्तान मिट भावसारले ४६ बलमा १० चौका सहित ५४ रन जोडेका छन् । उनलाई जुडे जोहन साल्दान्हाले २६ बलमा २ चौका सहित १७ रन जोड्दै राम्रो साथ दिएका छन् ।

सिनियर टोलीबाट खेलि सकेका तीव्र गतिका बलर गुलशन झाले पहिलो ओभरमै २१ रन खर्चिदै खराब सुरुवात दिलाएका थिए । दोस्रो ओभरमा बलिङ गर्न आएका प्रकाश जैशीले तीन चौकासहित १५ रन खर्चेपछि कुवेतले सुरुवाती दुई ओभरमै ३६ रन जोड्दै उत्कृष्ट सुरुवात गरेको थियो । शेर मल्लले ५ ओभरमा २६ रन खर्चेका छन् । बशिर अहमदले ३ ओभरमा ६ रन र देव खनालले १ ओभरमा ९ रन खर्चिए ।

त्यसअघि शारजाहमा टस हारेर ब्याटिङ थालेको नेपाल ४२.३ ओभरमा २ सय ३९ रनमा अल आउट भएको थियो । नेपालका स्पिन अलराउन्डर बशिर अहमदले ६१ बलमा ७ चौका र १ छक्कासहित सर्वाधिक ५६ रनको अर्धशतकीय इनिङ खेले । विवेक रानामगरले ७१ बलमा ६ चौकासहित ५० रनको योगदान दिए ।

एक समय ४.३ ओभरमा २७–३ को कमजोर अवस्थामा पुगेको नेपाललाई चौथो विकेटका लागि विवेक रानामगर र बशिर अहमदले १ सय १५ बलमा ९२ रनको साझेदारी गर्दै इनिङ उकासेका थिए । आदिल अन्सारीले आक्रामक ब्याटिङ गर्दै ४२ बलमा २ चौका र ५ छक्कासहित ४९ रनमा आउट भए । कुवेतका मिर्जा अहमदले ५ ओभरमा २२ रन खर्चेर ३ विकेट लिए । अब्दुल सदिकले ७.३ ओभरमा ४२ रन खर्चेर ३ विकेट लिए ।