एजेन्सी – इंग्ल्यान्डका कप्तान जो रुट सहित चार खेलाडी आइसिसी पुरुष टेस्ट प्लेयर अफ द इयर २०२१ को मनोनयन सूचिमा परेका छन् । आइसिसीले मंगलबार सार्वजनिक गरेको मनोनयनमा रुटसँगै न्युजिल्यान्डका तीव्र गतिका बलर काइल जेमिसन, भारतका स्पिनर रविचन्द्रन आश्विन र श्रीलंकाका कप्तान दिमुथ करुणारत्ने छन् ।

जो रुटले २०२१ मा १५ टेस्ट खेलमा ६ शतक सहित १ हजार ७ सय ८ रन बनाएका थिए । टेस्ट इतिहासमा एकै वर्ष सर्वाधिक रन बनाउने खेलाडीमा रुट तेस्रो स्थानमा छन् । एक वषै रुटअघि पाकिस्तानका मोहम्मद युसुफले २००६ मा १ हजार ७ सय ८८ रन र वेस्टइन्डिजका भिभ रिचर्ड्सले १९७६ मा १ हजार ७ सय १० रन बनाएका थिए ।

रुटले भारतसँगको चार टेस्ट मध्य पहिलो खेलमा चेन्नईमा २ सय १८ रनको दोहोरो शतकीय इनिङ खेलेका थिए । त्यसअघि श्रीलंकाविरुद्ध जनवरीमा पहिलो टेस्टमा २ सय २८ र दोस्रो टेस्टमा १ सय ८६ रनको इनिङ खेलेका थिए ।

भारतीय स्पिन अलराउन्डर आश्विनले यस वर्ष ८ खेलमा ५२ विकेट लिनुको साथै ३ सय ३७ रन बनाएका थिए । जसमा एक शतक सामेल थियो । घरेलु मैदानमा इंग्ल्यान्डसँगको चार टेस्ट सिरिज ३–१ ले जित्न आश्विनले ३२ विकेट लिएका थिए । इंग्ल्यान्डसँग दोस्रो टेस्ट खेलमा आश्विनले दोस्रो इनिङमा १ सय ६ रनको शतकीय इनिङ खेलेका थिए ।

न्युजिल्यान्डलाई आइसिसी विश्व टेस्ट च्याम्पियनसिपको उपाधि जिताउन जेमिसनले सर्वोत्कृष्ट प्रदर्शन गरेका थिए । तीव्र गतिका बलिङ अलराउन्डर जेमिसनले ५ खेलमा २७ विकेट लिएका थिए ।

न्युजिल्यान्डले भारतलाई फाइनलमा ८ विकेटले हराउँदै उपाधि जित्न जेमिसनले उत्कृष्ट अलराउन्ड प्रदर्शनका साथ प्लेयर अफ द म्याच चुनिएका थिए । उक्त फाइनलमा पहिलो इनिङमा ५ र दोस्रोमा ३ विकेट लिएका थिए । जनवरीमा पाकिस्तानसँगको दोस्रो टेस्ट खेलमा पहिलो इनिङमा ५ र दोस्रोमा ६ विकेट लिएका थिए ।

दिमुथ करुणारत्नेले २०२१ मा ७ खेलमा ४ शतक सहित ९ सय २ रन बनाएका थिए । करुणारत्नेले बंगलादेशसँगको पहिलो टेस्ट खेलमा २ सय ४४ रनको दोहोरो र दोस्रो खेलमा १ सय १८ रनको शतकीय इनिङ खेलेका थिए । जनवरीमा दक्षिण अफ्रिकालाई १० विकेटले हराउन करुणारत्नेले दोस्रो इनिङमा १ सय ३ रनको शतकीय इनिङ खेलेका थिए ।

विजेता घोषणा आइसिसीको भोटिङ एकेडेमी, विश्वव्यापी क्रिकेट पत्रकार, बोडकास्टहरुले पहिलो, दोस्रो र तेस्रो रोजाईमा भोट गर्नेछन् । त्यस्तै समर्थहरुले पनि भोट गर्न पाउनेछन् । आइसिसीले विभिन्न विधाका अवार्डहरु सार्वजनिक गर्नेछ । नेपाली खेलाडीहरुको लागि भने आइसिसी पुरुष र महिला एसोसियट क्रिकेटर अफ द इयर अवार्डमा सम्भावना हुनेछ ।