एजेन्सी – अन्तर्राष्ट्रिय क्रिकेट परिषद् (आइसिसी) ले भारतीय क्रिकेट टोलीलाई जरिवना लगाएको छ । दक्षिण अफ्रिकासँग पहिलो टेस्ट खेलमा गल्ती गरेपछि भारतलाई २० प्रतिशत म्याच फि जरिवना लगाएको आइसिसीले जनाएको छ ।

सुपरस्पोर्ट्स पार्क सेन्चुरियनमा सम्पन्न पहिलो टेस्ट खेलमा भारत १ सय १३ रनले विजयी भएको थियो । भारतले लक्ष्य दिनेक्रममा निर्धारित समय भन्दा एक ओभर ढिलो गरेपछि स्वलो ओभर रेटका कारण २० प्रतिशत जरिवना लागेको हो । आइसिसीको नियम अनुसार एक ओभर ढिलो भएको खण्डमा २० प्रतिशत म्याच काटिने गर्दछ ।

त्यस्तै आइसिसी विश्व टेस्ट च्याम्पिनसिप प्लेइङ कन्डिसनको नियम १६.११ अनुसार एक ओभर ढिलो भएमा एक अंक काटिने गर्दछ । त्यसै अनुसार भारतको विश्व टेस्ट च्याम्पियनसिप अंक तालिकामा एक अंक काटिएको छ । भारतीय क्रिकेट टोलीका कप्तान विराट कोहलीले पनि उक्त गल्ती स्वीकार गरेका छन् । भारत र दक्षिण अफ्रिकाबीचको दोस्रो टेस्ट खेल सोमबारदेखि सुरुहुनेछ ।

विश्व टेस्ट च्याम्पियनसिपको नियम अनुसार एक जितको १२ अंक र १०० प्रतिशत विजयी अंक प्राप्त गर्नेछ । अंक तालिकामा विजयी प्रतिशतलाई आधार मानिने गरिन्छ । खेल बराबरी भएमा ६ अंक र ५० प्रतिशत तथा ड्र भएमा ४ अंक तथा ३३.३३ प्रतिशत प्राप्त गर्नेछन् ।
विश्व वरीयता शीर्ष नौं टोलीले प्रतिस्पर्धा गरेका छन् ।

च्याम्पियनसिपको शीर्ष दुई टोलीले फाइनल खेल्नेछन् । अष्ट्रेलिया ३ खेलमा शतप्रतिशत जितका साथ ३६ अंक जोड्दै शीर्ष स्थानमा छ । श्रीलंका दुवै खेलमा विजयी हुँदै २४ अंकका साथ दोस्रो स्थानमा छ । पाकिस्तान ४ खेलमा ३ मा जित र १ मा हार सहित ७५ प्रतिशत अंकका साथ तेस्रो स्थानमा छ ।

भारत ७ टेस्ट खेलमा ४ मा जित, १ मा हार र २ बराबरीका साथ ६३.०९ का साथ चौथो स्थानमा छ । विश्व टेस्ट च्याम्पियनसिप २०१९/२१ को फाइनलमा भारतलाई ८ विकेटले हराउँदै न्युजिल्यान्डले उपाधि जितेको थियो ।