एजेन्सी – ओपनर लोकेश राहुलले दक्षिण अफ्रिकासँग दोस्रो टेस्ट खेलमा भारतको कप्तानी गर्ने भएका छन् । दी वान्डरर्स स्टेडियम जोहानेसबर्गमा भारतको कप्तानी लोकेश राहुलले गर्दै टस जितेर पहिला ब्याटिङ गर्ने निर्णय लिएका छन् । नियमित कप्तान विराट कोहली चोटका कारण गुमाउने भएपछि राहुलले भारतको कप्तानी गरेका हुन् ।

राहुल भारतको ३४ औं टेस्ट कप्तान हुन् । राहुलका अनुसार कोहलीको ढाडको माथिल्लो भागमा चोटका कारण टोलीमा छैनन् । विराट कोहली फिट नभएपछि उनको स्थानमा भारतले अलराउन्डर हनुमा विहारीलाई मौका दिएको छ । दक्षिण अफ्रिकाले दुई परिवर्तन गरेको छ । सन्न्यास लिएका क्विन्टन डि कको स्थानमा काइल भेरिनेलाई टोलीमा मौका दिएको छ । त्यस्तै वियान मुल्डरको स्थानमा डुआने ओलिभियरले मौका पाएका छन् ।

राहुलले दक्षिण अफ्रिकासँग तीन ओडिआई खेलको पनि कप्तान गर्नेछन् । नव नियुक्त कप्तान रोहित शर्मा चोटको कारण टोली बाहिर हुँदा राहुलले ओडिआईको नेतृत्व गर्नेछन् । तीन टेस्ट खेलको सिरिजमा भारतले १-० को अग्रता लिएको छ । राहुलले दक्षिण अफ्रिकासँग पहिलो टेस्ट खेलमा १ सय २३ रनको शतकीय इनिङ खेल्दै प्लेयर अफ द म्याच चुनिएका थिए ।

पहिलो खेलमा भारत १ सय १३ रनले विजयी भएको थियो । राहुलले इन्डियन प्रिमियर लिग (आइपिएल) मा पन्जाब किंग्सको कप्तानी गरि सकेका छन् । आगमी दिनमा राहुललाई भारतीय नियमति कप्तानको रुपमा समेत हेरिदै आएको छ ।