काठमाडौं (हाम्रो खेलकुद) – पूर्व कप्तान ज्ञानेन्द्र मल्ल आगमी फेब्रुअरीमा ओमानमा हुने आइसिसी टि२० विश्वकप ग्लोबल छनोट ए को लागि राष्ट्रिय क्रिकेट टोलीको बन्द प्रशिक्षणमा सहभागी हुन होटल पुगेका छन् ।

ज्ञानेन्द्र सोमबार दिउँसो क्रिकेट टोली रहेको होटल रमादा पुगेका हुन् । तीव्र गतिका बलर सोमपाल कामी र करण केसी बाहेक अन्य सबै खेलाडी होटल पुगेका छन् । यी दुई खेलाडी पनि आझ साँझ सम्म आइपुग्ने बुझिएको छ ।

३० खेलाडीलाई बोलाईएको बन्द प्रशिक्षणमा सोमबार १४ खेलाडी मैदानमा सहभागी थिए । पहिलो दिन टोली फिटनेश परिक्षण गर्नुको साथै सामान्य अभ्यास गरेको थियो । पिसिआर परिक्षण बाँकी रहेको कारण तीव्र गतिका बलर नन्दन यादव, विनोद भण्डारी, हरि शंकर शाह, विक्रम सोब र सुशान भारी होटलमा थिए । कारबाहीमा परेका ज्ञानेन्द्र मल्ल, सोमपाल कामी, कमलसिंह ऐरी, दीपेन्द्र ऐरी, करण केसी, अभिनाश बोहरा, रोहित कुमार पौडेल, कुशल भुर्तेल र सन्दीप जोराले रिपोर्टिङ गरेका थिएनन् । नौ जना मध्य करण र सोमपाल बाहेक अन्य सबै होटल पुगेका हुन् ।

कप्तान सन्दीप लामिछाने भने बिग ब्यास लिगको लागि अष्ट्रेलियामामा छन् । सन्दीप पहिलो चरणको बिग ब्यास पछि टोलीमा सामेल हुने आशा गरिएको मुख्य प्रशिक्षक पुबुदु दासानायिकेले जनाए । सन्दीप सम्मिलित होबार्ट हरिकेन्सको पहिलो चरणको खेल जनवरी १९ मा सकिनेछ ।

ज्ञानेन्द्र, सोमपाल, दीपेन्द्र र कमलले कार्तिक अन्तिम साता ग्रेडमा असन्तुष्टिलाई लिएर मिडियामा आएर बोलेपछि विवाद सुरु भएको थियो । क्यानले स्पष्टीकरण हुँदै मंसिर २९ मा कप्तान र उपकप्तान हटाउँदै उक्त चार क्रिकेटरलाई २०२२ को सुरुवाती ६ महिना ग्रेडमै नराख्ने निर्णय गरेको थियो । ग्रेडमा नराख्ने निर्णय भने क्यानले आगमी बोर्ड बैठकमार्फत फिर्ता लिने भएको छ । आइतबार क्यान र ज्ञानेन्द्रबीच प्रशिक्षणमा फर्किने सहमती बनेको थियो । कप्तान भने सन्दीप लामिछाने नै हुनेछन् ।

पहिलो चरणको बन्द प्रशिक्षण एक हप्ता पुगनपुग हुनेछ । प्रधानमन्त्री कपको लागि सम्भवत एक दिनअघि क्यानले खेलाडी फुकुवा गर्नेछ । टि२० विश्वकपको ग्लोबल छनोट अन्तर्गत समूह ए को खेल सन् २०२२ फेब्रुअरी १५ देखि २५ सम्म ओमानमा आयोजना हुनेछ । समूह ए मा नेपालसँगै आयरल्यान्ड, ओमान, युएई, फिलिपिन्स, जमर्नी, क्यानडा र बहराइन छन् । समूहको शीर्ष दुई टोलीले अष्ट्रेलियामा हुने टि२० विश्वकपमा स्थान पक्का गर्नेछन् ।

क्यानले घोषणा गरेको नेपालको पहिलो चरणको ३० सदस्य टोली :

सन्दीप लामिछाने, ज्ञानेन्द्र मल्ल, दीपेन्द्रसिंह ऐरी, शरद भेषावकर, करण केसी, सोमपाल कामी, मोहम्मद आरिफ शेख, विनोद भण्डारी, कुशल मल्ल, कुशल भुर्तेल, मोहम्मद आशिफ शेख, कमलसिंह ऐरी, साहब आलम, सन्दीप जोरा, अभिनाश बोहरा, सुशान भारी, पवन सरार्फ, विक्रम सोब, भीम सार्की, रोहित कुमार पौडेल, प्रदीप ऐरी, गुलशन कुमार झा, नन्दन यादव, जितेन्द्र मुखिया, विवेक कुमार यादव, सौरभ खनाल, राजेश पुलामी मगर, किशोर महतो, सागर ढकाल र हरि शंकर शाह ।