एजेन्सी – युवा बायाँ हाते तीव्र गतिका बलर मार्को ज्यानसनको घातक बलिङसँगै दक्षिण अफ्रिकासँग दोस्रो टेस्ट खेलको पहिलो इनिङमा भारत २ सय २ रनमै अल आउट भएको छ ।

दी वान्डरर्स स्टेडियम जोहानेसबर्गमा टस जितेर पहिला ब्याटिङ थालेको भारत पहिलो दिन अन्तिम सेसनमा ६३.१ ओभरमा २ सय २ रनमा अल आउट भयो । भारतका कप्तान लोकेश राहुलले १ सय ३३ बलमा ९ चौका सहित सर्वाधिक ५० रनको योगदान दिए । राहुल बाहेक अन्य कुनैपनि ब्याटरले राम्रो प्रदर्शन गर्न सकेनन् ।

नियमित कप्तान विराट कोहली ढाडको माथिल्लो भागमा समस्याका कारण दोस्रो टेस्ट गुमाएका थिए । भारतलाई राहुल र मयंक अग्रवालले १४.१ ओभरमा ३६ रनको साझेदारी गर्दै मध्यम सुरुवात दिलाएका थिए । तर बाँकी १३ रन जोड्न प्रमुख तीन विकेट गुमाएपछि भारतले खराब सुरुवात गरेको थियो ।

युवा तीव्र गतिका बलर मार्को ज्यानसनले अग्रवाललाई २६ रनमा क्याच गराउँदै पहिलो सफलता दिलाएका थिए । त्यसपछि अर्का तीव्र गतिका बलर डुआने ओलिवियरले चेतेश्वर पुजारालाई तीन रनमा टेम्बा बभुमाबाट क्याच गराए । लगत्तै अर्को बलमा अजिंक्या रहाणे गोल्डेन डक आउट भएपछि भारत २३.४ ओभरमा ४९–३ को कमजोर अवस्थामा पुगेको थियो । हनुमा विहारीलाई कागिसो रबाडाले रास्सी भान डर डुसेनबाट २० रनमा उत्कृष्ट क्याच आउट गराएपछि भारत धरासयी बनेको थियो ।

ज्यानसनले ४६ औं ओभरको पाँचौं बलमा राहुललाई रबाडाबाट क्याच गराएपछि भारत संकटमानै परेको थियो । शार्दुल ठाकुर शून्य र मोहम्मद शामी ९ रनमा आउट भए । जस्प्रित बुमराह ११ बलमा २ चौका र १ छक्कासहित १४ रनमा अविजित रहे ।

दक्षिण अफ्रिकाका युवा तीव्र गतिका बलर मार्को ज्यानसनले १७ ओभरमा ५ मेडनसहित ३१ रन खर्चेर ४ विकेट लिए । कागिसो रबाडा र डुआने ओलिवियरले ३-३ विकेट लिए ।