काठमाडौं (हाम्रो खेलकुद) – नेपाल एपिएफ क्लबका युवा ब्याटर लोकेश बमले प्रधानमन्त्री कप टि२० राष्ट्रिय क्रिकेट प्रतियोगितामा बागमती प्रदेशविरुद्ध विष्फोटक ब्याटिङ गरेका छन् । १ सय २६ रनको विजयी लक्ष्य पछ्याउनेक्रममा एपिएफले ८ ओभरमा २ विकेट गुमाउँदै ७५ रन बनाएको छ ।

लोकेशले २४ बलमा १० चौका र १ छक्कासहित ५० रनमा क्याच आउट भए । लोकेशले सुवास खत्रीको सातौं ओभरको तेस्रो बलमा एक रन बटुल्दै २१ बलमा अर्धशतक पूरा गरेका थिए । आसिफ शेख ५ बलमा ३ चौकासहित १२ रनमा क्याच आउट भए ।

लोकेशले चौथो ओभरमा तीव्र गतिका बलर रामनरेश गिरीलाई एकै ओभरमा पाँच चौका र एक छक्का गरि कुल २६ रन जोडेका थिए । चौथो बलमा छक्का प्रहार गरेका लोकेशले अन्य सबै बलमा चौका प्रहार गरे । तीव्र गतिका बलर प्रतिश जि.सी.को बलमा ठूलो शट खेल्नेक्रममा लोकेश आदिल खानबाट लङअनमा क्याच आउट भए ।

टियु क्रिकेट मैदानमा टस जितेर ब्याटिङ रोजेको बागमतीले निर्धारित २० ओभरमा ८ विकेट गुमाउँदै १ सय २५ रन बनाएको थियो । बागमती प्रदेशका ओपनर ईशान पान्डेले २४ बलमा २ चौका र १ छक्कासहित सर्वाधिक २९ रन बनाए । नन्दन यादवले १६ बलमा ३ चौका र १ छक्कासहित तल्लोक्रममा २४ रन जोडेका थिए ।

ओपनर सुवास खकुरेल १८ बलमा ३ चौका सहित २१ र कप्तान ज्ञानेन्द्र मल्ल ४ बलमा १ छक्कासहित ६ रनमा आउट भए । २० बल खेलेका सुमन सुनवार ७, विपिन आचार्य ५ र रिजन ढकाल ६ रनमा आउट भए ।

एपिएफका तीव्र गतिका बलर अभिनाश बोहराले ४ ओभरमा ३२ रन खर्चेर ४ विकेट लिए । अर्का तीव्र गतिका बलर कमलसिंह ऐरीले ४ ओभरमा ३२ रन खर्चेर २ विकेट लिए । किशोर महतो र भुवन कार्कीले १–१ विकेट लिए ।