काठमाडौं (हाम्रो खेलकुद) – गण्डकी प्रदेशका युवा ओपनर अर्जुन कुमाल प्रधानमन्त्री कप टि२० राष्ट्रिय क्रिकेट प्रतियोगिताम प्रदेश दुईसँग पराजित भएपनि प्लेयर अफ द म्याच चुनिएका छन् । मुलपानीमा भएको खेलमा गण्डकी प्रदेश दुई सँग २ विकेटले पराजित भएको थियो ।

१ सय १७ रनको विजयी लक्ष्य प्रदेश दुईले १८.१ ओभरमा ८ विकेट गुमाउँदै पूरा गर्यो । प्रदेश दुईको जितमा कप्तान हासिम अन्सारीले २७ बलमा २ चौका र १ छक्कासहित सर्वाधिक २६ रन बनाए । ओपनर सन्तोष कार्कीले २१ बलमा २ चौका र २ छक्कासहित २३ रनमा आउट सवास भण्डारीको बलमा कटएण्ड बोल्ड आउट भएका थिए ।

१८ बल खेलेका अर्का ओपनर हरिशंकर शाहले १ छक्का सहित १२ रन बनाए । प्रदेश दुईको मध्यक्रम नचल्दा संघर्ष गरेको थियो । मध्यक्रमका महबुब आलम गोल्डेन डक, हरिकृष्ण झा १७, आदिल आलम १, विवेक यादव १० र विशाल शुश्लिङले ३ रन बनाए । गण्डकीका कृष्ण पौडेलले ३ ओभरमा ११ रन खर्चेर ३ विकेट लिए । विशाल पौडेल र सुवास भण्डारीले २–२ विकेट लिए ।

त्यसअघि मुलपानी क्रिकेट मैदानमा टस जितेर ब्याटिङ थालेको गण्डकीले निर्धारित २० ओभरमा ७ विकेट गुमाउँदै १ सय १६ रन बनाएको थियो । गण्डकीका युवा ओपनर अर्जुन कुमालले ३९ बलमा ६ चौकासहित सर्वाधिक ४१ रन बनाए । अर्जुन १८ औं ओभरको अन्तिम बलमा रन आउट भएका थिए । टोली पराजित भए पनि उनी खेलको प्लेयर अफ द म्याच चुनिए ।

मध्यक्रमका सन्दीप क्षेत्रीले २४ बलमा २ चौका र १ छक्कासहित २७ रन जोडेका थिए । अनिल गुरुङ १०, विधान श्रेष्ठ ५, अभिषेक बस्नेत ३ र विपिन क्षेत्री १० रनमा आउट भए । प्रदेश दुईका आदिल आलमले सर्वाधिक दुई विकेट लिए । विवेक यादव, हरिशंकर शाह र जितेन्द्र यादवले एक एक विकेट लिए ।

प्रदेश दुई पहिलो खेलमा एपिएफसँग २४ रनले पराजित भएको थियो । अव प्रदेश दुईले विहीबार टियु मैदानमा लुम्बिनी प्रदेशसँग खेल्नेछ । समूह बी मा एपिएफ २ खेलमा ४ अंकका साथ शीर्ष स्थानमा छ । बागमती समान खेलमा एकमा हार र एकमा जितका साथ २ अंक जोड्दै दोस्रो स्थानमा छ । २ खेलमा १ मा जित र १ मा हार सहित प्रदेश २ तेस्रो स्थानमा छ । गण्डकीले आफ्नो दोस्रो खेल विहीबार एपिएफसँग मुलपानीमानै खेल्नेछ ।