काठमाडौं (हाम्रो खेलकुद) – युवा स्पिनर अनिल खरेलको घातक बलिङसँगै लुम्बिनी प्रदेशले प्रधानमन्त्री कप टि२० राष्ट्रिय क्रिकेट प्रतियोगिताम प्रदेश २ माथि सानदार जित हात पारेको छ । विहीबार लुम्बिनी प्रदेशले प्रदेश २ लाई ४२ रनले हराएको छ ।

१ सय ६२ रनको बलियो विजयी लक्ष्य पछ्याएको प्रदेश २ ले निर्धारित २० ओभरमा ९ विकेट गुमाउँदै १ सय १९ रन बनायो । प्रदेश २ का विवेक यादवले २४ बलमा २ चौका र ३ छक्का सहित सर्वाधिक ३६ रनमा अविजित रहे । बलिङ गर्नेक्रममा घाइते भएपछि अस्पताल गएर फर्किएका विवेकले १० औं नम्बरमा ब्याटिङ गर्दै आक्रामक इनिङ खेलेपनि टोलीको हार टार्न सकेनन् ।

ओपनर सन्तोष कार्कीले १३ बलमा १ चौका र १ सहित १४ रन बनाए । हरिशंकर शाहलाई स्पिनर अनिल खरेलले बशिर अहमदबाट तीन रनमा क्याच गराए । अनिलले नै यसै ओभरको अन्तिम बलमा सन्तोष कार्कीलाई बोल्ड आउट गरे । विशाल शुश्लिङलाई अनिल खरेलले शून्यमा बोल्ड गर्दै ५ ओभरमा २८–३ को कमजोर अवस्थामा पुर्याए । कृष्ण कार्कीले हासिम अन्सारीलाई शून्यामा सौरभ खनालबाट क्याच गराए ।

प्रदेश २ लाई त्यसपछि आदिल अन्सारी अन्तिम आशाको क्रममा थिए । अनिलको बलमा ठूलो सट खेल्ने धुनमा टप एज लागेर १३ रनमा कट एण्ड बोल्ड आउट भएपछि प्रदेश २ को सम्भावना सकिएको थियो । आदिलले ८ बलमा २ छक्का प्रहार गरे । रुपेश सिंह १३ रनमा रन आउट भए । अनिल खरेलले ४ ओभरमा १ मेडन सहित १३ रन खर्चेर ५ विकेट लिए । कृष्ण कार्की, सिद्धान्त शाही र बशिर अहमदले १–१ विकेट लिए ।

त्यसअघि टियु क्रिकेट मैदानमा टस जितेर ब्याटिङ रोजेको लुम्बिनीले निर्धारित २० ओभरमा ८ विकेट गुमाउँदै १ सय ६१ रन बनायो । लुम्बिनीका ओपनर देव खनालले ३८ बलमा ४ चौका र २ छक्कासहित सर्वाधिक ५४ रनको योगदान दिए ।

ओपनर सौरभ खनाललाई हरिशंकर शाहले १० रनमा एलबीडब्लू आउट गरेका थिए । सुशान्त थापा १४ बलमा १ चौका र १ छक्कासहित १४ रनमा मोहम्मद आदिल अन्सारीको बलमा एलबीडब्लू आउट भए ।

सन्दीप रजाली १८ बलमा २ चौका र १ छक्कासहित ३० रनमा क्याच आउट भए । ३७ बल खेलेका बशिर अहमदले १ चौका सहित ३० रनमा क्याच भए । कृष्ण कार्की १, विक्रम भुषाल ५, दुर्गेश गुप्ता, मोहन क्षेत्री र सिद्धान्त शाहीले खाता खोल्न सकेनन् ।

प्रदेश २ का विवेक यादव र रुपेश सिंहले २–२ विकेट लिए । हरिशंकर शाह, महबुब आलम र विशाल शुश्लिङ १–१ विकेट लिए । पहिलो खेलमा प्रदेश २ एपिएफसँग २४ रनले पराजित भएको थियो । दोस्रो खेलमा गण्डकी प्रदेशलाई २ रनले हराएको थियो । प्रदेश २ ले अन्तिम खेल शुक्रबार बागमतीसँग खेल्नेछ । लुम्बिनी पहिलो खेलमा बागमतीसँग ४९ रनले पराजित भएको थियो । लुम्बिनीले शुक्रबार मुलपानीमा एपिएफसँग खेल्नेछ । लुम्बिनीलाई शीर्ष दुईमा रहेर सेमिफाइनल खेल्न एपिएफलाई हराउनै पर्ने हुन्छ ।