काठमाडौं (हाम्रो खेलकुद) – तीव्र गतिका बलर विक्रम सोबको ६ विकेट लिँदै अलराउन्ड प्रदर्शन गरेपछि त्रिभुवन आर्मी क्लबले प्रधानमन्त्री कप टि२० राष्ट्रिय प्रतियोगितामा सुदूरपश्चिममाथि तीन विकेटको रोमान्चक जित हात पारेको छ ।

रोमान्चक जितसँगै आर्मीले सेमिफाइनल सम्भावना राखेको छ । आर्मीको सेमिफाइनल सम्भावनामा प्रदेश १ को नतिजाले निर्भर रहनेछ । १ सय १६ रनको विजयी लक्ष्य पछ्याएको आर्मीले २० ओभरमा ७ विकेट गुमाउँदै पूरा गर्यो । आर्मीलाई जितको लागि अन्तिम बलमा दुई रन चाहिँएको अवस्थामा स्पिनर साहब आलमले छक्का प्रहार गर्दै जित पक्का गराए । विक्रम सोब २२ बलमा १ चौका र २ छक्कासहित २९ रनमा अविजित रहे । साहब आलम ६ बलमा १२ रनमा अविजित रहे ।

आर्मीका ओपनर हरि चौहानले ३९ बलमा ४ चौकासहित सर्वाधिक ३३ रन बनाए । भीम सार्की १३, रोहित कुमार पौडेल ५, विनोद भण्डारी ३ र कुशल मल्ल ११ रनमा आउट भए । सुदूरपश्चिम प्रदेशका स्पिनर आदित्य महताले ४ ओभरमा १४ रन खर्चेर ४ विकेट लिए । हेमन्त धामी, नारायण जोशी र शेर मल्लले १–१ विकेट लिए ।

त्यसअघि मुलपानी क्रिकेट मैदानमा टस हारेर ब्याटिङको निम्तो पाएको सुदूरपश्चिम २० ओभरमा १ सय १५ रनमा अल आउट भयो । सुदूरपश्चिम प्रदेशका खडक बोहराले ४२ बलमा १ चौका र १ छक्कासहित सर्वाधिक ३७ रन बनाए । वसन्त कार्कीले २८ बलमा २ छक्कासहित ३४ रन जोडे । अन्य कुनैपनि ब्याटरले राम्रो प्रदर्शन गर्न सकेनन् । आर्मीका तीव्र गतिका बलर विक्रम सोबले ४ ओभरमा ८ रन खर्चेर ६ विकेट लिए । साहब आलम, कुशल मल्ल र हरि चौहानले १–१ विकेट लिए ।

समूह ए बाट पुलिस ३ खेलमा ६ अंकका साथ शीर्ष स्थानमा रहँदै सेमिफाइनलमा पुगेको छ । आर्मी ४ खेलमा २ मा जित र १ मा हार सहित ५ अंकका साथ दोस्रो स्थानमा छ । आर्मीको सेमिफाइनल सम्भावना प्रदेश १ को नतिजामा निर्भर रहनेछ । प्रदेश १ ले २ खेलमा १ अंक जोड्दै पुछारमा छ ।

समूह चरणमा आर्मी र प्रदेश १ ले समूह चरणमा झिजेको आउट फिल्डको कारण खेल खेल्न नसक्दा अंक बाँडेका थिए । प्रदेश १ ले शनिबार पुलिस र आइतबार सुदूरपश्चिमसँग टियुमा खेल्नेछ । प्रदेश एक ले बाँकी दुई मध्य एक खेलमा हार बेहोरेको खण्डमा आर्मी सोझैं सेमिफाइनलमा पुग्नेछ । प्रदेश १ ले दुबै खेलमा जित निकालेको खण्डमा भने नेटरनरेटमा निर्भर रहनेछ । आर्मीको नेटरनरेट ०.८८९ र प्रदेश १ को माइनस १.५५० छ ।