काठमाडौं (हाम्रो खेलकुद) – प्रधानमन्त्री कप टि२० राष्ट्रिय प्रतियोगिता फाइनलमा पुग्न नेपाल पुलिस क्लबले बागमती प्रदेशलाई १ सय ५६ रनको मध्यम लक्ष्य दिएको छ ।

पहिलो सेमिफाइनल खेलमा टियु क्रिकेट मैदानमा टस जितेर ब्याटिङ रोजेको पुलिसले निर्धारित २० ओभरमा ५ विकेट गुमाउँदै १ सय ५५ रन बनायो । पुलिसका ओपनर पवन सरार्फले ५४ बलमा ३ चौका र ३ छक्कासहित सर्वाधिक ५९ रन जोडे ।

पवनले दुई जीवनदान पाएका थिए । त्यसको भरपुर सदुपयोग भने गर्न सकेनन् । स्पिनर तिलक भण्डारीको ११ औं ओभरको पाँचौं बलमा कभरमा सुमन सुनवारले पवनको ४३ रनमा ड्रप गरेका थिए । लगत्तै अर्को ओभरको तेस्रो बलमा विकेटकिपर लक्की कठायतले ४७ रनमा क्याच ड्रप गरेका थिए । पवनले ४८ बलमा अर्धशतक पूरा गरेका थिए ।

पुलिसले चौथो ओभरमा दुई ब्याटरलाई गुमाएको थियो । बायाँ हाते तीव्र गतिका बलर रिजन ढकालले चौथो ओभरको तेस्रो बलमा शंकर रानालाई ८ रनमा क्याच गराएका थिए । मिड अनमा रामनरेश गिरीले उत्कृष्ट क्याच लिँदै पेभेलिएन फर्काए । रिजनको यसै ओभरको अन्तिम बलमा ठूलो सट खेल्ने धुनमा टप एज लागेर मिडअफमा प्रतिश जि.सीबाट शून्यमा क्याच आउट हुन पुगे । अस्वस्थको कारण कुशल भुर्तेल टोलीमा नहुँदा रानाले ओपनिङ गरेका थिए ।

तेस्रो विकेटका लागि पवन र अनिल शाहले ७८ रनको साझेदारी गरेका थिए । १६ औं ओभरमा नन्दन यादवले दुई विकेट लिएका थिए । नन्दनले अनिल शाहलाई २५ रनमा एलबीडब्लू आउट गरे । २४ बल खेलेका अनिलले १ चौका प्रहार गरे । दुई बलपछि पवन तिलकबाट क्याच भएका थिए । आरिफ शेख ९ बलमा १ छक्कासहित १२ रनमा क्याच आउट भए ।

दीलिप नाथ १६ बलमा २ चौका र २ छक्कासहित ३१ रनमा अविजित रहे । राशिद खान ५ रनमा अविजित रहे । बागमतीका रिजन ढकालले ४ ओभरमा ३० रन खर्चेर २ विकेट लिए । नन्दन यादवले ४ ओभरमा २७ रन खर्चेर २ विकेट लिए । प्रतिश जि.सीले १ विकेट लिए ।