काठमाडौं (हाम्रो खेलकुद) – नेपाल एपिएफ क्लबका ओपनर आसिफ शेख र प्रदीप ऐरीले आफ्नो उच्च लयलाई निरन्तरता दिँदै त्रिभुवन आर्मी क्लबविरुद्ध प्रधानमन्त्री कप टि२० राष्ट्रिय प्रतियोगिताकै उत्कृष्ट साझेदारी गरेका छन् ।

टियु क्रिकेट मैदानमा टस हारेर ब्याटिङको निम्तो पाएको एपिएफले सुरुवाती १३ ओभरमा कुनै विकेट नगुमाउँदै १ सय २७ रन बनाएको छ । कुनैपनि विकेटका लागि यो जारी प्रतियोगिताकै उत्कृष्ट साझेदारी हो । आसिफ ३४ बलमा ७ चौका र ४ छक्कासहित ६४ रनमा अविजित छन् । आसिफको २९ बलमा जारी प्रतियोगितामा दोस्रो अर्धशतक प्रहार गरेका थिए ।

प्रदीप ऐरी ४४ बलमा ७ चौका र १ छक्का सहित ५१ रनमा अविजित छन् । जारी प्रधानमन्त्री कपमा आसिफ र प्रदीपको यो सर्वाधिक ठूलो साझेदारी हो । प्रदीप र आसिफले यसअघि प्रदेश २ विरुद्ध गरेको १ सय २० रनको आफ्नै शतकीय साझेदारी तोडेका हुन् । आसिफले प्रदेश २ विरुद्ध ६३ रनको इनिङ खेलेका थिए । प्रदीपले प्रदेश २ विरुद्ध ६० रन जोडेका थिए । आसिफ र प्रदीप दुबैको दोस्रो अर्धशतक हो । प्रदीपले ४२ बलमा अर्धशतक पूरा गरेका हुन् ।

पहिलो सेमिफाइनल खेलमा नेपाल पुलिस क्लबले बागमती प्रदेशलाई ५० रनले हराउँदै फाइनलमा पुगेको छ । फाइनल बुधबार हुनेछ । प्रतियोगिता विजेताले ५ लाख र उपविजेताले ३ लाख रुपैयाँ प्राप्त गर्नेछन् ।