एजेन्सी – भारतीय क्रिकेट टोलीका ओपनर लोकेश राहुलले इन्डियन प्रिमियर लिग (आइपिएल) २०२२ मा फ्रेन्चाइज टोली लखनऊको कप्तानी गर्ने भएका छन् । लखनऊले मेगा अक्सन अघि राहुलसँगै अष्ट्रेलिया स्टार अलराउन्डर मार्कस स्टोइनिस र भारतीय लेगस्पिनर रवि विश्रोई टोलीमा रहने भएका छन् ।

लखनऊले राहुललाई १५ करोड भारुमा अनुबन्ध गरेको इएसपिनक्रिकइन्फोले जनाएको छ । त्यस्तै स्टोइनिसलाई ११ करोड भारु र विश्रोईलाई ४ करोड भारुमा अनुबन्ध गरेको छ । पन्जाब किंग्सले राहुललाई टोलीबाट फुकुवा गरेको थियो । राहुल २०१८ यता आइपिएल र भारतीय क्रिकेट दुबैमा उत्कृष्ट प्रदर्शन गर्दै आएका छन् ।

राहुलले नै बुधबारबाट सुरु हुने दक्षिण अफ्रिकासँग हुने तीन ओडिआई सिरिजमा भारतको कप्तानी गर्दै छन् । पन्जाब किंग्सको पछिल्ला दुई सिजन राहुलले नेतृत्व गरेका थिए । राहुलले २०१३ मा रोयल च्यालेन्जर्स बेंगलोरबाट आफ्नो आइपिएल करिअर सुरु गरेका थिए ।

२०१४ मा भने राहुल सनराइजर्स हैदराबाद पुगेका थिए । तर २०१६ मा पुन बेंगलोर फर्किएका थिए । राहुलले २०१८ को अक्सनमा पन्जाबले ११ करोड भारुमा अनुबन्ध गरेको थियो ।

राहुल पन्जाब गएपछि २०१८ मा ६ सय ५९, २०१९ मा ५ सय ९३, २०२० मा ६ सय ७० रन र २०२१ मा ६ सय २६ रन बनाउँदै उत्कृष्ट प्रदर्शन गरेका थिए । २०२० मा राहुल सर्वाधिक रनका साथ ओरेन्ज क्याप जितेका थिए ।

अष्ट्रेलिया स्टार अलराउन्डर स्टोइनिसले २०१५ मा दिल्ली डेयर डेभिल्स (दिल्ली क्यापिटल्स) मा थिए । २०२० मा स्टोइनिस दिल्लीबाटै आइपिएलमा फर्किएका थिए । दिल्लीले स्टोइनिसलाई ४ करोड ८० लाखमा अनुबन्ध गरेको थियो । दिल्लीलाई २०२० मा पहिलो पटक फाइनलमा पुर्याउन स्टोइनिसले उत्कृष्ट अलराउन्ड प्रदर्शन गरेका थिए ।

२०२१ को टि२० विश्वकप अष्ट्रेलियालाई जिताउन सेमिफाइनलमा स्टोइनिसले पाकिस्तानविरुद्ध विजयी इनिङ खेलेका थिए । विश्रोई २०२० को यु१९ विश्वकपका सर्वाधिक विकेट लिने बलर हुन् । पन्जाबले त्यसै वर्ष विश्रोईलाई २ करोड भारुपमा अनुबन्ध गरेको थियो । पन्जाबबाट दुई सिजन खेल्दै विश्रोइले २३ खेलमा २४ विकेट लिई सकेका छन् ।

अर्को नयाँ टोली अहमदाबादले हार्दिक पान्ड्या, राशिद खान र शुभमन गिललाई टोलीमा अनुबन्ध गरेको छ । यो सिजनदेखि आइपिएलमा १० टोली छन् । अक्सन फेब्रुअरी १२ र १३ मा हुने भनिएको छ । तर आइपिएलले आधिकारिक रुपमा घोषणा गरेको छैन ।

यो पनि पढ्नुहोस् : आइपिएल : हार्दिक र राशिद अहमदाबादमा अनुबन्धित