एजेन्सी – भारतले दोस्रो टि२० आई खेलमा वेस्टइन्डिजमाथि रोमान्चक जित हात पार्दै तीन टि२० आई सिरिज एक खेल अगावै जितेको छ । शुक्रबार राती भारतले वेस्टइन्डिजलाई ८ रनले हराउँदै तीन टि२० आई खेलको सिरिज एक खेल अगावै जितेको हो ।

१ सय ८७ रनको विजयी लक्ष्य पछ्याएको वेस्टइन्डिजले निर्धारित २० ओभरमा ३ विकेट गुमाउँदै १ सय ७८ रन बनायो । वेस्टइन्डिजलाई जितको लागि अन्तिम ६ बलमा २५ रन चाहिँएको थियो । हर्षल पटेलले १६ रन खर्चिदै टोलीको जित पक्का गराए । रोभम्यान पावेलले तेस्रो र चौथो बलमा लगातार छक्का प्रहार गरेपनि जितको लागि पर्याप्त हुन सकेन ।

वेस्टइन्डिजका रोभम्यान पावेलले ३६ बलमा ४ चौका र ५ छक्कासहित ६८ रनको अविजित इनिङ रहे । विकेटकिपर निकोलस पुरनले ४१ बलमा ५ चौका र ३ छक्कासहित ६२ रनमा क्याच आउट भए । तेस्रो विकेटका लागि पावेल र पुरनले ६० बलमा १ सय रनको शतकीय साझेदारी गरेपनि टोलीको हार टार्न सकेनन् ।

ब्रेन्डन किंग ३० बलमा २२ रन, काइल मेयर्स ९ रनमा आउट हुँदा काइरन पोलार्ड ३ रनमा अविजित रहे । भारतका भुवनेश्वर कुमार, युजभेन्द्र चहल र रवि विश्रोईले १–१ विकेट लिए ।

त्यसअघि कोलकातामा टस हारेर ब्याटिङ थालेको भारतले निर्धारित २० ओभरमा ५ विकेट गुमाउँदै १ सय ८६ रन बनाएको थियो । भारतका विकेटकिपर ऋषभ पन्त २८ बलमा ७ चौका र १ छक्कासहित ५२ रनमा अविजित रहे । वेंकटेश ऐरले १८ बलमा ४ चौका र १ छक्कासहित ३३ रन जोडे ।

पाँचौं विकेटका लागि ऐर र पन्तले ३५ बलमा ७६ रनको महत्वपूर्ण साझेदारी गरेका थिए । त्यसअघि अनुभवी ब्याटर विराट कोहलीले ४१ बलमा ७ चौका र १ छक्कासहित ५२ रन बनाउँदै आउट भए । दोस्रो विकेटका लागि रोहित शर्मा र विराट कोहलीले ४९ रनको साझदारी गरेका थिए । रोहित शर्मा १९ र सूर्य कुमार यादव ८ रनमा आउट भए ।

वेस्टइन्डिजका स्पिनर रोश्टन चेशले ४ ओभरमा २५ रन खर्चेर ३ विकेट लिए । रोमारियो शेफर्ड र शेल्डन कटरेलले १–१ विकेट लिए । भारत पहिलो खेलमा ६ विकेटले विजयी भएको थियो । तेस्रो तथा अन्तिम टि२० आई खेल आइतबार हुनेछ ।