default_image

2 years ago

March 2, 2022

चम्कने अवसर नै नपाएकी ‘ज्योति’

भुपेन्द्र जिसी, काठमाडौं नेपाल एपिएफ क्लबकी ओपनर तथा विकेटकिपर ज्योति पाण्डे पछिल्लो समय घरेलु क्रिकेटमा लगातार उत्कृष्ट प्रदर्शन गर्दै आएकी छिन् । नेपाल एपिएफ क्लबले लगातार तीन घरेलु उपाधि जित्दा ज्योतिले उत्कृष्ट ब्याटिङ गरेकी छन् । पछिल्ला चार मध्य दुई घरेलु प्रतियोगितामा ज्योति सर्वोत्कृष्ट ब्याटरको अवार्ड जितेकी छन् । यसै साता ललितपुर मेयर वुमन्स च्याम्पियनसिपमा […]

169 views

0 Bookmark

भुपेन्द्र जिसी, काठमाडौं

नेपाल एपिएफ क्लबकी ओपनर तथा विकेटकिपर ज्योति पाण्डे पछिल्लो समय घरेलु क्रिकेटमा लगातार उत्कृष्ट प्रदर्शन गर्दै आएकी छिन् । नेपाल एपिएफ क्लबले लगातार तीन घरेलु उपाधि जित्दा ज्योतिले उत्कृष्ट ब्याटिङ गरेकी छन् । पछिल्ला चार मध्य दुई घरेलु प्रतियोगितामा ज्योति सर्वोत्कृष्ट ब्याटरको अवार्ड जितेकी छन् ।

यसै साता ललितपुर मेयर वुमन्स च्याम्पियनसिपमा एपिएफ च्याम्पियन बन्दा ज्योतिले सर्वोत्कृष्ट खेलाडीसहित तीन अवार्ड जितिन् । प्रतियोगिताकै सर्वोत्कृष्टसँगै उनी ब्याटर र प्लेयर अफ द फाइनल चुनिन् । ज्योति ५ खेलमा १ अर्धशतक सहित १ सय ५५ रनका साथ सर्वाधिक रन बनाउने सूचिको शीर्ष स्थानमा रहिन् । उनीपछि प्रतियोगितामा एक सय रनको आंकडा पार गर्ने खेलाडीमा सुदूरकी विन्दु रावल मात्र थिइन् । उनले १ सय ४ रन बनाएकी थिइन् ।

पछिल्ला सबै घरेलु प्रतियोगितामा ज्योतिको प्रदर्शन उत्कृष्ट छ । तर सिनियर टोलीमा त्यो लय देखाउने पर्याप्त अवसर पाएकी छैनन् । नेपालले गत नोभेम्बरमा मलेसियामा सम्पन्न आइसिसी टि२० विश्वकप एसिया क्षेत्र छनोटमा प्रतिस्पर्धा गर्दा ज्योति टोलीमा थिइन् । तर भुटान, कुवेत र मलेसियासँग प्लेइङ–११ रहेपनि ब्याटिङ गर्ने अवसर पाइनन् ।

त्यसअघि नेपालले कतारसँग तीन टि२० आई वुमन्स सिरिज खेलेको थियो । अन्तिम खेलमा नेपालले २० ओभरमा ३ विकेट गुमाउँदै १ सय ६४ रन बनायो । ओपनर सिता रानामगर ७२ बलमा ७ चौकासहित सर्वाधिक ८२ रनको अविजित रहिन् । जुन कुनैपनि अन्तर्राष्ट्रिय क्रिकेटमा नेपाली महिला क्रिकेटरले बनाएको उच्च प्रदर्शन हो । ज्योतिले २० बलमा १ चौकासहित २४ रनको योगदान दिइन् ।

दोस्रो विकेटका लागि ज्योति र सिताले ६७ रनको बलियो साझेदारी गर्दै नेपाली महिला क्रिकेटको सर्वाधिक ठूलो योगफलको आधार तय गरे । घरेलु क्रिकेटमा एपिएफबाट सिता र ज्योतिले ओपनिङ गर्दै आएका छन् । घरेलु क्रिकेटमासँगै ओपनिङ गर्ने खेलाडीलाई निरन्तरता दिंदा खेल्न झनै सजिलो हुन्छ । क्लबमा पनि साथमा प्रशिक्षण र खेल खेल्ने हुनाले एक अर्काले राम्रोसँग बुझेका हुन्छन् । तर नेपालले ज्योतिलाई तेस्रो नम्बरमा उतार्यो । ओपनर काजोल श्रेष्ठ चाँडै आउट भएपछि क्रिजमा आएर ज्योतिले राम्रो साझेदारी बनाइन् ।

छनोट प्रतियोगितामा त ज्योतिले ब्याटिङ गर्ने अवसर नै पाइनन् । कतारविरुद्ध खेलेको चार दिनपछि अर्थात २२ नोभेम्बरमा हङकङविरुद्ध ज्योति र सितालाई ओपनिङ गराउने अनुमान गरिएको थियो । तर नेपालले ज्योतिलाई प्लेइङ–११ मै राखेन । सिता र कुविता कुँवरका साथ ओपनिङ गराउँदा काजललाई तेस्रो नम्बरमा खेलाएको थियो । ओपनर कविता शून्यमा आउट भइन् । तेस्रो नम्बरकी काजल २३ बलमा ४ रनमा आउट भइन् । नेपाल ६ विकेटले पराजित हुँदै ग्लोबल छनोटमा पुग्ने सम्भावना कठिन बनायो । कुवेतविरुद्ध रुविना र सिता तथा मलेसियासँग सिता र इन्दुले ओपनिङ गरे ।

मलेसियासँग ९३ रनको लक्ष्य पछ्याउनेक्रममा नेपालले १८.२ ओभरमा ४ विकेट गुमाउँदै पूरा गर्यो । तर पनि ज्योतिले अवसर पाइनन् । ओपनरले चार विकेट गुम्दा सम्म मौका नपाउनुले ब्याटिङ क्रममा प्रश्न उठेको थियो । अन्तिम खेलमा नेपालले युएईसँग ज्योतिलाई प्लेइङ ११ मा राखेन । कुनैपनि खेलाडीलाई प्लेइङ ११ बाट बाहिर पछिल्लो खेलको प्रदर्शनको आधारमा राख्ने गरिन्छ । तर उनलाई कुनै अवसर नदिई राखेको थियो । त्यसैले ज्योतिले मौका नपाउँदा टिम म्यानेजमेन्ट, कप्तान र प्रशिक्षकमाथि प्रश्न उठेको थियो । जुन घरेलु प्रदर्शन र लय अनुसार स्वभाविक थियो ।

उक्त प्रतियोगितामा सिता बाहेक अन्य ब्याटरको प्रदर्शन पनि राम्रो थिएन । ओपनर नचल्दा पनि प्रमुख खेलाडीले ब्याटिङको अवसर पाइनन् । घरेलु क्रिकेटमा राम्रो प्रदर्शन गर्दापनि सिनियर टोलीमा अवसर किन नपाएको ज्योतिसँग जवाफ छैन । ज्योतिले सायद प्रशिक्षक र कप्तानको विश्वास जित्न नसकेको बताउँछिन् ।

‘बन्द प्रशिक्षणमा खेलाडी चल्यो भने यो उत्कृष्ट ब्याटर हो भन्ने मान्यता अझै पनि छ । प्रशिक्षकको म माथि अझैं विश्वास नभएर होला । टोलीको निर्णय कप्तान र प्रशिक्षकको हातमा हुन्छ । वहाँले मलाई कतिसम्म विश्वास गर्न सक्नुहुन्छ भन्ने हो । मौका किन पाएन मलाई थाहा छैन तर हुनसक्छ वहाँले अहिले सम्म विश्वास गर्न नसकेर होला’, ज्योतिले भनिन् ।

त्यसैमा उनले थपिन्, ‘म आफू योग्य छु जस्तो लाग्छ । तर मौका नपाउनुको कारण मलाई पनि थाहा छैन । मैले सोध्ने कुरा पनि हुँदैन । कप्तान र प्रशिक्षकको निर्णयलाई पालना र सम्मान गर्नुपर्छ ।’

नेपाली महिला क्रिकेट टोलीका प्रशिक्षक जगत टमाटा पनि ज्योतिले सिनियर टोलीमा अवसर नपाउनुमा ठ्याक्कै कारण बताउन सक्दैनन् ।
‘टिमको एउटा सन्तुलनको कुरा हुन्छ । ज्योति क्षमता भएको खेलाडी हुन् भन्नेमा कुनै शंका छैन । टि२० खेलमा विपक्षीलाई हेरेर रन बनाउनु पर्छ । उसको प्रदर्शन राम्रो छ । त्यहि अनुसार टोलीमा परेको हो । तर खेलमा रनको कुरा आउँछ । अहिले खेलेको तरिकाले म खुसी छु । अरु चाहिँ सुधार गर्नुपर्छ’, टमाटाले मौका नपाउनु बारे भने ।

‘म ज्योतिको कमजोरी त भन्दिन । उसले आफ्नो स्ट्राइक रेटलाई अझै राम्रो गराउन पर्यो । अहिले पनि राम्रो छ । अझै राम्रो गराउन पर्यो ।सबभन्दा ठूलो कुरा फिटनेस लेभललाई बढाउन पर्यो,’ उनले भने ।

नेपालले ओपनरको रुपमा ज्योति, काजल र सितालाई लगेको थियो । तर काजलले कुनैपनि खेलमा दोहोरो अंकमा रन बनाउन सकिनन् । फरक ओपनर प्रयोग गर्यो । तर प्रमुख ओपनर ज्योतिलाई अवसर नै दिएन ।

गत वर्ष पुषमा दाङको लमहीमा सम्पन्न प्रधानमन्त्री कप महिला टि२० राष्ट्रिय प्रतियोगिता फाइनलमा एपिएफ प्रदेश १ सँग ६ रनले स्तब्ध भयो । ज्योति ५ खेलमा १ सय ५१ रन बनाउँदै प्रतियोगिता उत्कृष्ट ब्याटर चुनिइन् । त्यसपछि चैतमा ज्योतिले ललितपुर मेयर वुमन्स च्याम्पिनसिप टि२० प्रतियोगितामा ५ खेलमा १ सय ३२ रनका साथ सर्वाधिक रन जोड्ने खेलाडी सुचिमा दोस्रो स्थानमा रहिन् । दुई महिना अघि धनगढीको फाप्ला क्रिकेट मैदानमा सम्पन्न प्रधानमन्त्री कपमा एपिएफलाई उपाधि जिताउन ज्योति ५ खेलमा १ सय ४ रनका साथ सर्वाधिक रन बनाउने सूचिमा चौथो स्थानमा रहिन् ।

लगातार राम्रो प्रदर्शन हुनुमा ज्योति समर्पण, रुचि र मिहिनेतको प्रतिफल पाएको बताउँछिन् । ‘यो सबै मेरो समर्पण हो । त्यसकारण यो सब पूरा भएको हो । जति खेलेपनि म सन्तुष्ट हुन्न । म झनै राम्रो गर्न चाहन्छु । जे कुराको लागि पनि रुचि हुनुपर्ने रहेछ । रुचि भयो त्यो काममा बढी ध्यान केन्द्रित हुन्छ । मलाई पनि क्रिकेटमा धेरै रुचि छ । मलाई पनि धेरै खेल्न मन लाग्छ’, ज्योतिले त्यसैमा थपिन्, ‘धेरै ध्यान केन्द्रित भएको हुँदा हरेक दिन राम्रो हुँदै गएको छ । लकडाउन अघि मैले डबल ट्रेनिङ गर्थे । त्यसपछि बिचमा छाडे ।’

ज्योतिको तथ्यांक मात्र हेर्दा पनि उनी घरेलु क्रिकेटमा पछिल्लो दुई वर्ष भएको प्रतियोगितामा सर्वाधिक रन बनाउने खेलाडी हुन् । उनले रन जोड्ने क्रममा राष्ट्रिय टोलीकी कप्तान रुविना क्षेत्रीलाई पनि पछि पारेकी छिन् । घरेलु क्रिकेटमा रुविनाको पनि प्रदर्शन गजबको छ । राष्ट्रिय टोलीमा पनि उनले त्यसै अनुसार खेलेकी छिन् । तर ज्योतिले भने निरन्तर राम्रो खेल्दा पनि अवसर पाएकी छैनन् ।

ज्योति एपिएफको टोलीबाट लगातार खेल्दै आएकी छिन् । पूर्वाञ्चलबाट राम्रो गर्दै उनी एपिएफको पहिलो टोलीमै परेकी थिइन् । विराटनगरकी ज्योतिले सन् २०११ देखि लगातार एपिएफबाट खेल्दै आएकी छिन् । सुरुवातमा ज्योतिलाई एपिएफको प्लेइङ–११ मा पर्न कठिन पर्दथ्यो । तर पछिल्लो समय उनी टोलीको मुख्य खेलाडीको रुपमा नै स्थापित भएकी छिन् । एपिएफकी कप्तान सिता रानामगर पनि ज्योतिले जिम्मेवारी वहन गर्दा टोलीलाई सहज भएको बताउँछिन् ।

‘ज्योतिको प्रदर्शन एकपछि अर्को राम्रो भएको छ । मलाई एकदमै खुसी लागेको छ । एपिएफलाई राम्रो योगफलमा पुर्याउनको उसको प्रदर्शन महत्वपूर्ण छ । प्रदर्शनमा उसले निरन्तरता देखाएकी छिन्’, एपिएफकी कप्तान तथा ओपनर सिताले भनिन् ।

‘ओपनिङ गर्न जानुअघि हामी दुवैले कुरा गर्छौं । जिम्मेवारी बढी हामीमा नै छ । हामीले पावर प्लेको फाइदा लियौं । विकेट नदिने र बल अनुसार खेल्नुपर्छ भन्ने सल्लाह हुन्छ,’ उनले सुनाइन् ।

ज्योतिले सन् २०१६ मा थाईल्यान्डमा भएको एसिसी वुमन्स एसिया कपमा पाकिस्तानविरुद्ध सिनियर डेब्यू गर्दै ८ रन जोडेकी थिइन् । दोस्रो खेलमा नेपाल श्रीलंकासँग २३ रनमा अल आउट भयो । ज्योतिले ३९ बलमा १६ रन जोडेकी थिइन् । सिता ४ र रुविना १ रनमा आउट हुँदा अन्यले खाता खोल्न सकेनन् ।

ज्योति आफूले खेल्ने हरेक प्रतियोगितामा राम्रो प्रदर्शन गर्ने लक्ष्यका साथ नै मिहिनेत गर्ने बताउँछिन् । ‘म हरेक प्रतियोगितामा रन बनाउन आत्माविश्वासी छु । पछिल्लो भ्रमणमा दुर्भाग्यपूर्ण मैले ब्याटिङको अवसर पाइँन । मैले आफूलाई देखाउने मौका पाएको छैन । २०१६ मा नेपाली टोलीमा डेब्यू गरे । त्यसपछि खासै अवसर पाएको छैन,’ उनले भनिन् ।

सन् २०१६ देखि २०१८ सम्म उनले नेपाली टोलीबाट खेलिन् । सन् २०१९ जनवरीमा थाईल्यान्ड वुमन्स टि२० साम्स खेल्नुअघि एपिएफमा फुटसल खेल्नेक्रममा बायाँ हात भाँचिएको थियो । त्यसैले उनले टि२० विश्वकप एसिया क्षेत्र छनोट गुमाएकी थिइन् । २०१९ डिसेम्बरमा पोखरामा भएको १३ औं सागको महिला क्रिकेट टोलीमा नि वैकल्पिक सूचिमा थिइन् । टोलीसँग पोखरा भने गएकी थिइन् ।

अवसर नपाउँदा हरेक खेलाडीमा झन् राम्रो प्रदर्शन गर्ने इख हुन्छ । ज्योतिले बोल्न भन्दा पनि ब्याटिङमा देखाउनु पर्ने बताउँछिन् । ‘मुख भन्दा पनि ब्याटले बोल्नु पर्यो । जति अरुले भन्छ त्यतिनै राम्रो गर्न मन लाग्छ । म हरेक खेलमा आफ्नो उत्कृष्ट प्रदर्शन दिन चाहन्छु’, उनले भनिन् ।

‘ब्याटिङ गर्दा रन लिन सक्नुपर्यो । २० ओभर खेल्न सक्नुपर्यो । यदि मान्छेमा त्यो क्षमता छ भने खेल्न किन योग्य छैन ?,’ ज्योतिले भनिन, ‘शारीरिक रुपमा तुलना गर्नु मलाई गलत लाग्छ । मैले त एउटा उदाहरण तयार गरेको छु जस्तो लाग्छ । मान्छेहरुमा मोटो मान्छेले केहि गर्न सक्दैन भन्ने भ्रम छ । मैले शरीर मोटो भएपनि खेल्न सक्छ भन्ने उदाहारण प्रस्तुत गरेको छु ।’

कुनैपनि खेलाडीको लय सधैं स्थिर हुन्छ भन्ने हुँदैन । त्यो लयको समयमा नै खेलाडीलाई अन्तर्राष्ट्रिय स्तरमा मापन गर्नुपर्छ । ज्योतिले घरेलु क्रिकेटमा गरेको प्रदर्शन हेर्दा सिनियर टोलीको दाबेदार हुन् । एकातर्फ ज्योतिको लगातारको उत्कृष्ट प्रदर्शन र अर्कोतर्फ नेपालको ब्याटिङमै समस्या हुँदा पनि आफ्नो प्रदर्शन देखाउने अवसर नदिनु न्यायपूर्ण पक्कै होइन ।

April 15, 2024

आफ्नै कीर्तिमान सुधार्दै हैदराबाद विजयी

एजेन्सी – इन्डियन प्रिमियर लिग (आईपीएल) जारी संस्करणमा नै इतिहासको सर्वाधिक योगफल बनाएर सनराइजर्स हैदराबादले कीर्तिमान सुधारेको छ । मार्च २७ मा मुम्बई इन्डियन्स विरुद्ध २ सय ७७ रन बनाएको हैदराबादले आज रोयल च्यालेन्जर्स बेंगलुरु विरुद्ध २ सय ८७ रन बनाउन सफल भयो । यो संस्करण अघि रोयल च्यालेन्जर्स बंगलुरुले सन् २०१३ मा बनाएको २ […]

April 15, 2024

कुवेतको दोस्रो जित 

मस्कट (हाम्रो खेलकुद) – ओमानमा जारी एसीसी प्रिमियर कपमा कुवेतले दोस्रो जित दर्ता गरेको छ । पहिलो खेलमा युएई विरुद्ध हार बेहोरेको कुवेतले लगातार दोस्रो जित दर्ता गर्ने क्रममा बहराइन माथि २६ रनको जित निकालेको हो । वर्षाका कारण १५ ओभरमा घटाइएको खेलमा १६२ रनको विशाल लक्ष्य पछ्याएको बहराइनले ६ विकेट गुमाउँदै १३५ रन मात्र […]

April 15, 2024

ओमानको युएईविरुद्ध सहज जित

मस्कट (हाम्रो खेलकुद) – ओमनमा जारी एसिसि प्रिमियर कपमा घरेलु टोलीमा ओमानले लगातार तेस्रो जित दर्ता गरेको छ । लगातार तेस्रो जित हासिल गर्ने क्रममा ओमानले युएई माथि ९ विकेटको सानदार जित निकालेको हो । वर्षाका कारण १५ ओभर प्रति टोलीमा घटाइएको खेलमा युएईले दिएको १४३ रनको लक्ष्य ओमानले १२.४ ओभरमै १ विकेट मात्र गुमाएर […]

Success

Thank you for your time.