एजेन्सी – पपुवा न्युगिनीले आइसिसी विश्वकप लिग-२ मा घरेलु टोली युएईमाथि ६ विकेटको सानदार जित हात पारेको छ । योसँगै पपुवा न्युगिनीले आइसिसी विश्वकप लिग-२ मा पहिलो जित हात पार्न सफल भएको छ । यसअघि पपुवा न्युगिनीले खेलेका १४ खेलमा नै हार बेहोरेको थियो ।

१ सय ४८ रनको विजयी लक्ष्य पपुवा न्युगिनीले ३६.२ ओभरमा ४ विकेट गुमाउँदै पूरा गर्यो । पपुवा न्युगिनीको जितमा कप्तान असाद भाला ९७ बलमा ६ चौकासहित ६८ रनमा अविजित रहे । भालाले बासिल हामिदलाई लगातार दुई चौका प्रहार गर्दै जित पक्का गराए । तेस्रो विकेटका लागि चाल्स अमिनी र भालाले ७१ रनको साझेदारी गर्दै जितको आधार तय गरेका थिए ।

अमिनी ५४ बलमा २ चौकासहित ३६ रनमा आउट भए । ओपनर टोनी उरा र लेगा सियाका १०–१० रनमा आउट भए । युएईका कासिफ दाउद, अहमद राजा र रोहन मुस्तफाले १–१ विकेट लिए ।

त्यसअघि दुबई इन्टरनेशल क्रिकेट स्टेडियममा टस जितेर पहिला ब्याटिङ गर्दै ५० ओभरमा १ सय ४७ रनमा अल आउट भएको थियो । युएईका अनुभवी अलराउन्डर रोहन मुस्तफाले १ सय ४४ बलमा ११ चौका र १ छक्का सहित सर्वाधिक ८८ रनको इनिङ खेले । एक समय युएई आफ्नो ओडिआई इतिहासकै सबैभन्दा कम योगफल बनाउने अवस्थामा पुगेको थियो ।

त्यो अवस्थाबाट मुस्तफाले जिम्मेवारी ब्याटिङका साथ युएईको साख जोगाएका हुन् । ३६.३ ओभरमा ७७–९ को दयनिय अवस्थामा पुगेको युएईलाई मुस्तफाले अन्तिम विकेटका जहुर खानसँग मिलेर ७० रनको साझेदारी गर्दै मध्यम योगफलमा पुर्याए । ७० मध्य २ रन मात्र जहुर खानले बनाएका थिए । जहुर खान १९ बलमा २ रनमा अविजित रहे । युएईका ९ खेलाडीले दोहोरो अंकमा रन बनाउन सकेनन् ।

बासिल हामिदले ५४ बलमा २० रन बनाए । एक समय १०.२ ओभरमा १६–५ को अवस्थामा पुगेको युएईलाई छैंटौं विकेटका लागि मुस्तफा र हामिदले ४२ रनको साझेदारी गरेका थिए । पपुवा न्युगिनीका तीव्र गतिका बलर एलाई नावोले युएईको शीर्षक्रम धरासय बनाएका थिए । उनले ओपनर चिराग सुरीलाई १ रनमा बोल्ड गर्दा मोहम्मद वासिमलाई लेगा सियाकाबाट ६ रनमा क्याच गराए ।

उनलेनै वृत्य अरविन्दलाई ६ र अलिशान शरिफुललाई शून्यमा आउट गर्दै संकटमा पुर्याए । त्यसपछि चाद सोपरले युएईको मध्यक्रम ध्वस्त बनाए । उनले सिपी रिजवानलाई १, अहमद राजालाई ६ र सुनैद सिद्दिकलाई शून्यमा आउट भए ।

पपुया न्युगिनीका एलाई नावोले १० ओभरमा १ मेडनसहित २७ रन खर्चेर ४ विकेट लिए । चाद सोपरले ८ ओभरमा २ मेडनसहित १५ रन खर्चेर ३ विकेट लिए । राइली हेकुरेले २ विकेट लिए ।

पपुवा न्युगिनी पहिलो खेलमा युएईसँग ७ विकेट र दोस्रो खेलमा नेपालसँग २ विकेटले पराजित भएको थियो । पपुवा न्युगिनीले अव मंगलबार नेपालसँग खेल्नेछ । त्यसपछि दुई ओडिआई खेल खेल्न नेपालमै आउनेछ । नेपाल सोमबार युएईसँग खेल्नेछ । पहिलो खेलमा पपुवा न्युगिनीलाई हराउँदा दोस्रो खेलमा युएईसँग ४८ रनले पराजित भएको थियो ।

अंक तालिका

ओमान २७ खेलमा १७ मा जित र ८ मा हार सहित ३६ अंक जोड्दै शीर्षस्थानमा छ । युएई १७ खेलमा ९ मा जित र ६ मा हार सहित २० अंकका साथ दोस्रो स्थानमा छ । स्कटल्यान्ड १२ खेलमा ७ मा जित र ३ मा हार सहित १६ अंकका साथ तेस्रो स्थानमा छ ।

अमेरिका १६ खेलमा ७ मा जित र ९ मा हार सहित १४ अंक भएपनि नेटरनरेटका कारण चौथो स्थानमा छ । नामिबिया १३ खेलमा ६ मा जित र ७ मा हार सहित १२ अंकका साथ पाँचौं स्थानमा छ । नेपाल १० खेलमा ५ मा जित र ५ मा हारसहित १० अंकका साथ छैटौं स्थानमा छ । पपुवा न्युगिनी १५ खेलमा १४ खेलमा हार र १ मा जितका साथ पुछारमा छ ।