काठमाडौं (हाम्रो खेलकुद) – नेपाली क्रिकेट टोलीका युवा आक्रामक ब्याटर लोकेश बमले रुपन्देहीमा जारी तिलोत्तमा प्रिमियर लिग–टि२० क्रिकेट प्रतियोगितामा आक्रामक ब्याटिङ गरेका छन् । जेभी वारियर्सबाट लोकेशले न्यू होराइजविरुद्ध विष्फोटक ब्याटिङ गरेका हुन् ।

टस जितेर पहिला ब्याटिङ थालेको जेभी वारियर्सले निर्धारित २० ओभरमा ७ विकेट गुमाउँदै १ सय ५६ रन बनायो । लोकेशले ५२ बलमा ३ चौका र ८ छक्कासहित ८६ रनको आक्रामक ब्याटिङ गरे । सिनियर टोलीकै अर्का ब्याटर रोहित पौडेलले ४५ बलमा ६ चौका र १ छक्कासहित ५४ रनको अर्धशतकीय इनिङ खेले ।

सोमबार नेपालले त्रिकोणात्मक टि२० आई सिरिजको उपाधि जितेपछि तिलोत्तमा पुगेका लोकेश र रोहितले उत्कृष्ट ब्याटिङ गरेका हुन् । नेपाललाई च्याम्पियन बनाउन रोहितले महत्वपूर्ण प्रदर्शन गरेका थिए । लोकेश भने पहिलो खेलमा पीएनजीसँगपछि बेन्चमा थिए ।

न्यू होराइजनका तीव्र गतिका बायाँ हाते बलर मोहम्मद हसैनले ४ ओभरमा २१ रन खर्चेर २ विकेट लिए । १ सय ५८ रनको विजयी लक्ष्य पछ्याएको न्यू होराइज १२ ओभरमै ६३ रनमा अल आउट भयो । उसका लागि मनिष थापाले सर्वाधिक १८ रन बनाए । बायाँ हाते स्पिनर बसिर अहमदले ४ ओभरमा १२ रन खर्चेर ५ विकेट लिए ।

अर्को खेलमा सुपर ११ भैरहवाले तिलोत्तमा टाइगर्सलाई ५ विकेटले हरायो । पहिला ब्याटिङ गरेको तिलोत्तमाले २० ओभरमा ९ विकेट गुमाउँदै १ सय ८ रन बनाएको थियो । उसका लागि आयुषमान बम २९ र सिनियर टोलीका ब्याटर सन्दीप जोरा १४ रनमा आउट भए । भैहरवाका अभिषेक गौतमले ४ ओभरमा २७ रन खर्चेर ४ विकेट लिए । सिनियर टोलीबाट खेलि सकेका तीव्र गतिका बलर राशिद खानले भने २ विकेट लिए ।

१ सय ९ रनको लक्ष्य भैरहवाले १८.५ ओभरमा ५ विकेट गुमाउँदै पूरा गर्यो । भैरहवाका सन्दीप रजालीले ५३ बलमा ७ चौका र १ छक्कासहित सर्वाधिक ५४ रन बनाए । पुरण बिकले २२ बलमा ४ चौका र १ छक्कासहित ३० रन बनाए ।