एजेन्सी – पाकिस्तानसँगको एकमात्र टि२० आई खेलमा अष्ट्रेलिया ३ विकेटले विजयी भएको छ । योसँगै अष्ट्रेलियाको २४ वर्षपछि पाकिस्तान भ्रमण सकिएको छ । टेस्ट र टि२० सिरिज अष्ट्रेलियाले जित्दा ओडिआई भने गुमाउन पुगेको थियो ।

जितको लागि १ सय ६३ रनको विजयी लक्ष्य पछ्याएको अष्ट्रेलियाले १९.१ ओभरमा ७ विकेट गुमाउँदै पूरा गर्यो । अष्ट्रेलियाको जितमा कप्तान आरोन फिन्चले ४५ बलमा ६ चौकासहित सर्वाधिक ५५ रन बनाए । ओपनर ट्रविस हेड १४ बलमा ३ चौका र १ छक्कासहित २६ रनमा आउट भए ।

जोश इंश्लिस २४, मार्कस स्टोइनिस २३ र बेन म्याकडेर्मोट २२ रन बनाए । पाकिस्तानका शाहिन शाह अफ्रिदी, उस्मान कादिर र मोहम्मद वासिम जुनियरले २–२ विकेट लिए ।

त्यसअघि गद्दाफी स्टेडियम लाहोरमा टस हारेर ब्याटिङ थालेको घरेलु टोली पाकिस्तानले २० ओभरमा ८ विकेट गुमाउँदै १ सय ६२ रन बनाएको थियो । पाकिस्तानका कप्तान बाबर आजमले ४६ बलमा ६ चौका र २ छक्कासहित सर्वाधिक ६६ रन बनाए । मोहम्मद रिजवान २३, फखार जमान गोल्डेन डक, इफ्तिखर अहमद १३, खुसदील शाह २४ र उस्मान कादिरले १८ रन बनाए ।

अष्ट्रेलिया तीव्र गतिका बलर नाथन एलिसले ४ ओभरमा २८ रन खर्चेर ४ विकेट लिए । डेब्यु खेल खेलेका क्यामरन ग्रिनले ३ ओभरमा १६ रन खर्चेर २ विकेट लिए । तीन टेस्ट खेलको सिरिज अष्ट्रेलियाले १–० ले जितेको थियो । तीन ओडिआई खेलको सिरिज पाकिस्तानले २–१ ले जितेको थियो ।