एजेन्सी – युगान्डाले दोस्रो टि२० आई खेलमा घरेलु टोली नामिबियामाथि ७ विकेटको सानदार कीर्तिमानी जित हात पारेको छ । योसँगै तीन टि२० आईको खेलको सिरिज १–१ को अवस्थामा पुगेको छ ।

१ सय ७८ रनको विजयी लक्ष्य युगान्डाले १९.५ ओभरमा ३ विकेट गुमाउँदै पूरा गर्यो । युगान्डाको जितमा मध्यक्रमका ब्याटर दिनेश नक्रानी ३९ बलमा ८ चौका र ३ छक्कासहित ७७ रनमा अविजित रहे । यो युगान्डाले टि२० आईमा बनाएको उसको इतिहासकै सर्वाधिक ठूलो योगफल हो ।

यसअघि युगान्डाको टि२० आईमा सर्वाधिक ठूलो योगफल १ सय ७६ रन अघिल्लो वर्ष रवान्डाविरुद्ध थियो । रियाजत अली शाह ४३ रनमा ४ चौका र ३ छक्कासहित ५७ रनमा अविजित रहे । चौथो विकेटका लागि शाह र नक्रानीले १ सय १८ रनको कीर्तिमानी शतकीय साझेदारी गरेपछि युगान्डाले आफ्नो इतिहासकै एक उत्कृष्ट जित हात पारेको हो ।

जुन युगान्डाका ब्याटरले गरेको सर्वाधिक ठूलो साझेदारी पनि हो । नामिबियाका कप्तान गेरहार्ड इरास्मसले २ विकेट लिए । त्यसअघि नामिबियाले टस हारेर पहिला ब्याटिङ गर्दै निर्धारित २० ओभरमा ४ विकेट गुमाउँदै १ सय ७७ रन बनाएको थियो ।

नामिबियाका कप्तान गेरहार्ड इरास्मसले ४७ बलमा ९ चौका र ७ छक्कासहित १ सय रनको सानदार शतकीय इनिङ खेलेपनि टोलीको हार भने टार्न सकेनन् । जेपी कोट्जेले ३० बलमा ४ चौका र २ छक्कासहित ३९ रन जोडे । युगान्डाका अली शाहले सर्वाधिक २ विकेट लिए । पहिलो खेलमा नामिबिया ८ विकेटले विजयी भएको थियो । तेस्रो खेल आइतबार हुनेछ ।