एजेन्सी – इंग्ल्यान्डका टेस्ट कप्तान बेन स्टोक्सले चर्चित घरेलु प्रतियोगिता काउन्ट्री च्याम्पियनसिपको डिभिजन टु मा डरहमबाट १७ छक्कासहित विष्फोटक शतक प्रहार गरेका छन् ।

डरहमबाट स्टोक्सले वोस्टरशायरविरुद्ध सानदार शतक प्रहार गरेका हुन् । टस जितेर पहिला ब्याटिङ गर्दै डरहमले ५८०–६ को अवस्थामा इनिङ समाप्तिको घोषणा गरेको थियो । स्टोक्सले ८८ बलमा ८ चौका र १७ छक्कासहित १ सय ६१ रनको विष्फोटक शतकीय इनिङ खेले ।

स्टोक्सले जसक्रममा जोश ब्रेकरलाई एकै ओभरमा पाँच छक्का र एक चौकासहित कुल ३४ रन जोडेका थिए । सुरुवाती पाँच बलमा लगातार पाँच छक्का प्रहार गरेका थिए । उनले ६४ बलमै शतक प्रहार गरेका थिए ।

डेविड बेदिंघम १ सय ७५ बलमा १५ चौका र २ छक्कासहित १ सय ३५ रन बनाए । शेन डिक्सनले १ सय ८४ बलमा १४ चौका र १ छक्कासहित १ सय ४ रन बनाए ।

अघिल्लो साता इंग्ल्यान्डले बेन स्टोक्सलाई टेस्टको कप्तानमा नियुक्त गरेको थियो । जो रुटले कप्तानी छाडेपछि स्टोक्सले उक्त नेतृत्व सम्हाल्लेका हुन् । स्टोक्सले घरेलु क्रिकेट खेल्न इन्डियन प्रिमियर लिग (आइपिएल) मेगा अक्सनमा आफ्नो नाम दिएका थिएनन् ।

विश्वका एक उत्कृष्ट अलराउन्डर बेन स्टोक्स इंग्ल्यान्डका प्रमुख खम्बा हुन् । स्टोक्सकै उत्कृष्ट प्रदर्शन सन् २०१९ मा इंग्ल्यान्डले पहिलो पटक एकदिवसिय विश्वकप उपाधि जितेको थियो ।