काठमाडौं (हाम्रो खेलकुद) – इन्डियन प्रिमियर लिग (आइपिएल) २०२२ को पहिलो क्वालिफायरमा राजस्थान रोयल्सविरुद्ध गुजरात टाइटन्सले टस जितेर पहिला फिल्डिङ गर्ने भएको छ । इडेन गार्डेन कोलकातामा गुजरातका कप्तान हार्दिक पान्ड्याले टस जितेर पहिला फिल्डिङ गर्ने निर्णय लिएका छन् ।

गुजरातले आजको खेलमा एक परिवर्तन गरेको छ । तीव्र गतिका बलर लोकी फर्गुसनको स्थानमा अल्जारी जोशेफलाई मैदान उतारेको छ । राजस्थानले भने टोलीमा परिवर्तन गरेको छैन ।

राजस्थान २००८ पछि पहिलो पटक फाइनमा पुग्ने सोचमा छ । नव टोली गुजरात पहिलो प्रयासमै फाइनलमा पुग्न चाहन्छ । राजस्थान २००८ को च्याम्पियन टोली हो । राजस्थानका ओपनर जस बटलरको प्रदर्शन निकै महत्वपूर्ण हुनेछ । पछिल्ला तीन खेलमा बटलर दोहोरो अंकमा रन बनाउन सकेका छैनन् ।

सुरुवाती समय उच्च लयमा रहँदै बटलरले १४ खेलमा ३ मा शतक र ३ मा अर्धशतक सहित ६ सय २९ रन बनाएका छन् । पछिल्ला पाँच खेलमा अर्धशतक विहीन बटलर आज निर्णायक बन्नसक्छन् । यस सिजनमा राजस्थानको बलिङ आक्रामण उत्कृष्ट छ । तीव्र गतिका बलर ट्रेन्ट बोल्ट, ओबेद म्याकोय र प्रसिद्ध कृष्णा छन् । स्पिनरमा युजभेन्द्र चहल र आश्विन छन् । चहल यस सिजनमा सर्वाधिक विकेट लिने बलर हुन् । उनले २६ विकेट लिएका छन् ।

ओपनर ऋद्धिमान शाहले ९ खेलमा ३ मा अर्धशतकसहित ३ सय १२ रन बनाएका छन् । हार्दिक पान्ड्या प्रमुख खेलाडी हुन् । हार्दिकले यस सिजनमा ४ अर्धशतकसहित कुल ४ सय १३ रन बनाएका छन् । हार्दिकको प्रदर्शन निकै महत्वपूर्ण हुनेछ । डेविड मिलर र राहुल टेवाटिया गुजरातका फिनिसर हुन् ।

गुजरातका तीव्र गतिका बलर मोहम्मद शामी, ल्योकी फर्गुसन र अल्जारी जोशेफ छन् । विश्व स्टार राशिद खान गुजरातका हतियार हुन् । उनले १८ विकेट लिई सकेका छन् । उनको प्रदर्शन मध्यक्रममा निकै महत्वपूर्ण हुनेछ । यस अघि लिगको खेलमा राजस्थान गुजरातसँग ३४ रनले पराजित भएको थियो ।

राजस्थानको प्लेइङ ११ : यशस्वी जैसवाल, जस बटलर, सन्जु स्यामसन(कप्तान तथा विकेटकिपर), देवदत्त पाडिक्कल, रविचन्द्रन आश्विन, शिम्रन हेटमायर, रियान पराग, ट्रेन्ट बोल्ट, प्रसिद्ध कृष्ण, युजभेन्द्र चहल, र ओबेद म्याकोय ।

गुजरातको प्लेइङ ११ : ऋद्धिमान शाह(विकेटकिपर), शुभमन गिल, म्याथ्यु वेड, हार्दिक पान्ड्या, डेविड मिलर, राहुल टेवाटिया, राशिद खान, रवि साई किशोर, यश दयाल, अल्जारी जोशेफ र मोहम्मद शामी ।