एजेन्सी – शीर्षक्रमका ब्याटर राजत पाटिदारको विष्फोटक शतकमा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ को एलिमिनेटर खेलमा लखनऊ सुपर जायन्ट्सलाई २ सय ८ रनको विशाल लक्ष्य दिएको छ ।

इडेन गार्डेन कोलकातामा टस हारेर ब्याटिङको निम्तो पाएको बेंगलोरले निर्धारित २० ओभरमा ४ विकेट गुमाउँदै २ सय ७ रन बनायो । बेंगलोरका राजत पाटिदारले ५४ बलमा १२ चौका र ७ छक्कासहित १ सय १२ रनको अविजित शतकीय इनिङ खेले ।

पाटिदारले ४९ बलमा आफ्नो आइपिएल र टि२० करिअरको पहिलो शतक पूरा गरेका थिए । मोहसिन खानलाई मिडविकेटमा छक्का प्रहार गर्दै आइपिएल प्लेअफमा शतक प्रहार गर्ने पहिलो अनक्याप्ड खेलाडी बने ।

यसअघि आइपिएलको प्लेअफ वा नकआउटको खेलमा अनक्याप्ड खेलाडीको रुपमा सर्वाधिक रन मनिष पाण्डेको नाममा छ । पाण्डेले २०१४ मा कोलकाता नाइट राइडर्सबाट पन्जाबकिंग्सविरुद्ध ९४ रन बनाएका थिए ।

विकेटकिपर दीनेश कार्तिक २३ बलमा ५ चौका र १ छक्कासहित ३७ रनमा अविजित रहे । पाँचौं विकेटका लागि कार्तिक र पाटिदारले ४१ बलमा ९२ रनको अविजित साझेदारी गर्दै विशाल योगफलमा पुर्याए । अन्तिम पाँच ओभरमा बेंगलोरले ८४ रन जोडेको थियो ।

तीव्र गतिका बलर मोहसिन खानले पहिलो ओभरको पाँचौं बलमा कप्तान फाफ डु प्लेसिसलाई क्विन्टन डि ककबाट क्याच गराउँदै गोल्डेन डक पेभेलिएन फर्काए । दोस्रो विकेटका लागि विराट कोहली र राजतले ६६ रनको साझेदारी गरेका थिए ।
कोहली आवेश खानको बलमा थर्डम्यानमा मोहसिन खानबाट २५ रनमा क्याच भए ।

कोहलीले २४ बलमा २ चौका हाने । स्पिन क्रुनाल पान्ड्याको बलमा ग्लेन म्याक्सवेल ९ रनमा डिप स्क्वायर लेगमा इविन लेविसबाट क्याच भए । लखनऊका मोहसिन खानले ४ ओभरमा २५ रन खर्चेर १ विकेट लिए । क्रुनाल पान्ड्याले ४ ओभरमा ३९ रन खर्चेर १ विकेट लिए । रवि विश्रोईले ४ ओभरमा ४५ रन खर्चेर १ विकेट लिए । आवेश खानको नाममा १ विकेट रह्यो ।