बुधबार राती रोयल च्यालेन्जर्स बेंगलोर इन्डियन प्रिमियर लिग (आइपिएल) २०२२ को एलिमिनेटर खेलमा लखनऊ सुपर जायन्ट्सलाई १४ रनले हराउँदै दोस्रो क्वालिफायरमा पुग्यो । त्यसका नायक शीर्षक्रमका ब्याटर रजत पाटिदार बने । इडेन गार्डेन कोलकातामा टस हारेर पहिला ब्याटिङ थालेको बेंगलोरले निर्धारित २० ओभरमा ६ विकेट गुमाउँदै २ सय ७ रन बनाएको थियो ।

पाटिदारले ५४ बलमा १२ चौका र ७ छक्कासहित १ सय १२ रनको उत्कृष्ट अविजित शतकीय इनिङ खेले । उक्त यादगार शतकीय इनिङले बेंगलोरलाई फाइनल पुग्नबाट एक कदम नजिक पुर्यायो । तर शतकधारी पाटिदार मेगा अक्सनमा न्यूनतम २० लाख रुपैयाँमा‌ पनि विक्री भएका थिएनन् ।

बेंगलोरका विश्व स्टार ब्याटर फाफ डु प्लेसिस गोल्डेन डक, विराट कोहली २५ र ग्लेन म्याक्सवेल ९ रनमा आउट हुँदा एक समय बेंगलोर समस्यामा परेको थियो । इडेन गार्डेनको ब्याटिङ सहयोगी पिचमा २ सय भन्दा कमको योगफल सुरक्षित मानिदैन । पहिलो ओभरको पाँचौं बलमा डु प्लेसिस मोहसिन खानको बलमा एज लागेर आउट भएपछि पाटिदार मैदान छिरेका थिए ।

त्यसपछि उनले अन्तिमसम्म खेल्दै बेंगलोरलाई सुरक्षित योगफलमा पुर्याए । उनी यस सिजन सर्वाधिक छिटो (४९ बलमा) शतक प्रहार गर्ने खेलाडी बने । यस सिजनमा यसअघि जस बटलरले तीन, लोकेश राहुलले दुई र क्विन्टन डि ककले एक शतक प्रहार गरेका थिए ।

सुरुवाती समय पाटिदार १३ बलमा १४ रन बनाएर खेलिरहेका थिए । विराट कोहलीले पनि रन बनाउन संघर्ष गर्दै १६ बलमा १७ रन बनाउँदै खेलेका थिए । छैटौं ओभरमा भारतीय अनुभवी बलर क्रुनाल पान्ड्यालाई पाटिदारले एकै ओभरमा तीन चौका र एक छक्कासहित कुल २० रन जोडे । उनले २८ बलमा अर्धशतक पूरा गरेका थिए ।

पाटिदार १५ औं ओभरमा ३९ बलमा ६६ रन बनाएर खेलिरहेका थिए । बेंगलोरले ४ विकेट गुमाउँदै १ सय २३ रन बनाएको थियो । त्यसपछि बाँकी १० बलमा उनले ३४ रन प्रहार गर्दै ४९ बलमै शतक हाने । आइपिएलको नकआउट वा प्लेअफमा शतक प्रहार गर्ने उनी पहिलो अनक्याप्ड खेलाडी (राष्ट्रिय टोलीबाट नखेलेको खेलाडी) बन्न पुगे ।

लामो समय क्रिजमा बिताएका उनले पिच र विपक्षी बलरलाई राम्रोसँग बुझिसकेका थिए । त्यसैले उनलाई अन्त्यतिर आक्रामक ब्याटिङ गर्न आवश्यक थियो । उनले १६ औं ओभरमा लेग स्पिनर रवि विश्रोईलाई तीन छक्का र दुई चौकासहित कुल २७ रन जोड्दै लखनऊलाई पूरै दबाबमा राखे ।

व्यक्तिगत ७२ रनमा दीपक हुडाले क्याच ड्रप गर्दै ठूलो जीवनदान दिए । १८ औं ओभरको चौथो बलमा यस सिजन उत्कृष्ट प्रदर्शन गरेका मोहसिन खानलाई ओभर मिडविकेटमा छक्का प्रहार गर्दै आइपिएल र टि२० करिअरको पहिलो शतक पूरा गरे । दीनेश कार्तिक र पाटिदार मिलेर अन्तिम ५ ओभरमा ८४ रन जोड्दै विशाल योगफलमा पुर्याएका थिए ।

मोहसिन खान, आवेश खान र दुश्मन्था चामिरा जस्ता तीव्र गतिका बलरलाई पन्छाउँदै उनले एक यादगार शतक प्रहार गरे । २ सय माथिको योगफल पूरा गर्न विपक्षी टोलीलाई पनि मानिसक रुपमा त्यति नै दबाब पर्दछ । दबाबले विकेटको अवसर बढी दिने गर्दछ ।

मेगा अक्सनमा अनसोल्ड

आइपिएल २०२२ को मेगा अक्सनमा पाटिदारलाई कुनैपनि टोलीले किनेनन् । गतवर्ष बेंगलोरबाट नै उनले आइपिएलमा डेब्यू गरेका थिए । तर यसपटक न्यूनतम २० लाख भारुमा पनि कुनै पनि टोलीले रुचि देखाएनन् । युवा ब्याटर लुभनिथ सिसोदिया घाइते भएपछि बेंगलोरले पाटिदारलाई न्यूनतम मूल्यमा उनको स्थानमा भित्र्याएको थियो ।

यस सिजनमा पाटिदार सुरुमा बेन्चमा थिए । ओपनर अनुज रावतले कमजोर प्रदर्शन गरेपछि बेंगलोरले पाटिदारलाई ३९ औं खेलमा राजस्थान रोयल्सविरुद्ध मैदान उतारेको थियो । रावतको स्थानमा विराट कोहलीले ओपनिङ गर्दा पाटिदारले तेस्रो नम्बरमा अवसर पाए ।

गुजरात टाइटन्सविरुद्ध ३२ बलमा ५२ रन जोडेका थिए । सोहि खेलमा कोहलीले ५३ बलमा ५८ रन बनाएका थिए । बेंगलोरलाई जित्नै पर्ने खेलमा उनले हैदराबादविरुद्ध ४८ रन जोड्दै राम्रो सुरुवात दिलाएका थिए ।

पाटिदारको जन्म सन् १९९३ मा जुन १ मा मध्य प्रदेशको इन्दोरमा भएको हो । उनले मध्य प्रदेशबाट घरेलु क्रिकेट खेल्ने गर्दछन् । २८ वर्षीय उनले ३९ प्रथम श्रेणीमा ७ शतक र १४ अर्धशतक सहित २ हजार ५ सय ८८ रन बनाएका छन् । लिष्ट ए मा तीन शतक र ५ अर्धशतक प्रहार गरेका छन् ।

‘मलाई विश्वास थियो एउटा राम्रो साझेदारी गर्न सकें भने टोलीलाई राम्रो योगफलमा पुर्याउन सक्छु’, उनले विराट कोहलीसँग खेलपछि भनेका छन् । उनले कोहलीसँग मिलेर दोस्रो विकेटका लागि ६६ रनको साझेदारी गरेका थिए । कोहली उनलाई सुरुमै आत्माविश्वासी देखेको बताउँछन् ।

‘मैले अहिले सम्म आइपिएलमा जति इनिङ खेलें त्यो १४-१५ ओभर सम्म थियो । मेरो लक्ष्य एकतर्फबाट टोलीलाई कसरी बलियो योगफलमा पुर्याउँ भन्ने थियो’, उनले भने । उनको शतकमा कोहलीको खुसी डगआउटमा देखिन्थ्यो ।

‘ लोकेश राहुल खेल्दा मलाई डर थियो । यदि राहुल अन्तिम सम्म खेले भने खेल हातबाट निक्लिन सक्छ । जसरी हुन्छ राहुललाई आउट गर्ने सोच थियो । राउल आउट हुँदा जित पक्का थियो’, पाटिदारले भने ।

‘२०२१ को आइपिएलपछि म घरेलु क्रिकेट खेल्न व्यस्त थिएँ । तर मलाई अक्सनमा कसैले पनि किनेनन् । त्यो मेरो नियन्त्रणमा पनि थिएन’, उनले अनसोल्ड हुनुबारे भने ।

बेंगलोरका कप्तान फाफ डु प्लेसिसले आइपिएलमा आफूले देखेको मध्य एक उत्कृष्ट शतक बताए । लखनऊका कप्तान लोकेश राहुलले पाटिदारले यस्तो शैलीमा खेल्नु फरक रहेको बताउँछन् । पाटिदारको शतकलाई लिएर विश्वभर चौतर्फी चर्चा भएको छ । भारतीय पूर्व महान् क्रिकेटर सचिन तेन्दुलकरले पाटिदारले आक्रामक ब्याटिङ साच्चै गम्भीर रहेको ट्वीट गरेका छन् ।

हो उनले भने जस्तै अक्सन उनको हातमा थिएन । तर पाएको अवसरमा प्रदर्शन गर्नेनै सबैभन्दा राम्रो प्रमाणित हो । त्यो पाटिदारले गरेका छन् । अक्नसमा भलै अन्य खेलाडीलाई जसरी मूल्य लागेन । तर करोडौं मूल्य पाएका खेलाडी होईन अनसोल्ड पाटिदारले बेंगलोर र उनका समर्थकलाई एलिमिनेटरमा सर्वाधिक धेरै खुसी दिए । यस खेल यो अर्थमा पनि महत्वपूर्ण थियो, पछिल्लो दुवै सिजन बेंगलोर एलिमिनेटरबाट अघि बढ्न सकेको थिएन ।

(एजेन्सीको सहयोगमा भूपेन्द्र जिसीको प्रस्तुति)