एजेन्सी – रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ को दोस्रो क्वालिफायर खेलमा राजस्थान रोयल्सलाई १ सय ५८ रनको लक्ष्य दिएको छ ।

नरेन्द्र मोदी स्टेडियम अहमदाबादमा टस हारेर ब्याटिङको निम्तो पाएको बेंगलोरले निर्धारित २० ओभरमा ८ विकेट गुमाउँदै १ सय ५७ रन बनायो । बेंगलोरका रजत पाटिदारले ४२ बलमा ४ चौका र ३ छक्कासहित सर्वाधिक ५८ रन बनाए । राजस्थानका तीव्र गतिका बलर ओबेद म्याकोय र प्रसिद्ध कृष्णले उत्कृष्ट बलिङ गरेपछि मध्यक योगफलमै रोकिएको थियो ।

पाटिदारले छैटौं ओभरको पाँचौं बलमा ब्यक्तिगत १४ रनमा जीवनदान पाएका थिए । प्रसिद्ध कृष्णको बलमा रियान परागले क्याच छाड्न पुग्दा अघिल्लो खेलमा लखनऊ सुपर जायन्ट्सविरुद्धका शतकदारीले जीवनदानको फाइदा उठाए । प्रमुख ब्याटर विराट कोहली पुन सस्तैमा आउट भए । तीव्र गतिका बलर प्रसिद्ध कृष्णको दोस्रो ओभरको पाँचौं बलमा आउटसाइड एज लागेर विकेटकिपर सञ्जु स्यामसनबाट ७ रनमा समातिए ।

दोस्रो विकेटका लागि पाटिदार र फाफ डु प्लेसिसले ७० रनको साझेदारी गर्दै बेंगलोरलाई अघि बढाए । डु प्लेसिस ओबेद म्याकोयको बलमा आश्विनबाट २५ रनमा क्याच भए । बेंगलोरका आक्रामक ब्याटर ग्लेन म्याक्सवेल १३ बलमा १ चौका र २ छक्कासहित २३ रनमा क्याच आउट भए । बोल्टको १४ औं ओभरको अन्तिम बलमा फाइन लेगमा छक्का हार्न खोजेपनि म्याकोयबाट क्याच भए ।

पाटिदार आश्विनको १६ औं ओभरको तेस्रो बलमा लगातार दुई छक्का हान्ने धुनमा जस बटलरबाट क्याच हुन पुगे । पाटिदार आउट भएपछि बेंगलोरले रनको गति बढाउन सकेन । दीनेश कार्तिक ६, महिपाल लोमरोर ८, हर्षल पटेल १, वानिन्दु हसरंगा गोल्डेन डक आउट भए । शहबाज अहमद १२ रनमा अविजित रहे ।

राजस्थानका तीव्र गतिका बलर प्रसिद्ध कृष्णले ४ ओभरमा २२ रन खर्चेर ३ विकेट लिए । बायाँ हाते तीव्र गतिका बलर ओबेद म्याकोयरले ४ ओभरमा २३ रन खर्चेर २ विकेट लिए । ट्रेन्ट बोल्ट र रविचन्द्रन आश्विनको नाममा १–१ विकेट रह्यो ।

आजको विजेता फाइनलमा पुग्नेछ । फाइनलमा गुजरात टाइटन्ससँग आइतबार प्रतिस्पर्धा गर्नेछ । पहिलो क्वालिफायरमा राजस्थानलाई ७ विकेटले हराउँदै गुजरात फाइनलमा पुगि सकेको छ ।