ह्युस्टन, अमेरिका (हाम्रो खेलकुद) – नेपालका कार्यवाहक कप्तान रोहित पौडेलले दोस्रो एकदिवसिय अभ्यास खेलमा ह्युस्टन हरिकेन्सविरुद्ध सानदार शतक प्रहार गरेका छन् । प्रेर क्रिकेट भ्यू कम्प्लेक्समा टसमा हारेर ब्याटिङको निम्तो पाएको नेपालले ३९ ओभरमा ५ विकेट गुमाउँदै २ सय ८ रन बनाएको छ ।

नेपालका कप्तान रोहित पौडेलले ९० बलमा ५ चौका र ४ छक्कासहित १ सय १ रनमा रन आउट भए । कमजोर सुरुवात गरेको नेपाललाई रोहितले सानदार शतकका साथ विशाल योगफलको आधार तय गरेका छन् । रोहितले ८९ बलमा शतक प्रहार गरेका थिए ।

आरिफ शेख र रोहित पौडेलले पाँचौं विकेटका लागि १ सय ८ रनको महत्वपूर्ण शतकीय साझेदारी गरे । आरिफ ५५ बलमा २ चौकासहित ३३ रनमा अविजित छन् । नेपाली अल स्टार्ससँग रोयल डक आउट भएका ओपनर कुशल भर्तुेल हरिकेन्सविरुद्ध ८ बल खेल्दै १ रनमा क्याच भए । कुशल तीव्र गतिका बलर हसन राशिदको दोस्रो ओभरको चौथो बलमा रमिज राजा जेआरबाट क्याच भए ।

दोस्रो विकेटका लागि देव खनाल र सुनिल धमलाले ३४ रनको साझेदारी गरे । धमला मोहम्मद इलायसको नवौं ओभरको तेस्रो बलमा धमला एज लागेर विकेटकिपर उस्मान राफिकबाट क्याच भए । धमलाले १६ बलमा १ चौकासहित १३ रन जोडे । यसै ओभरको अन्तिम बलमा कभर डाइभ सट खेल्न खोजेका देव खनाल फस्ट स्लिपमा राजाबाट १९ रनमा क्याच भए । ३१ बल खेलेका देवले ४ चौका प्रहार गरे ।

कमजोर सुरुवात गरेको नेपाललाई चौथो विकेटका लागि रोहित र दीपेन्द्रसिंह ऐरीले ६० रनको साझेदारी गर्दै इनिङ उकासेका थिए । दीपेन्द्र स्पिनर हरमित सिंहको बलमा विकेटकिपर उस्मान वाफिकबाट २४ रनमा क्याच आउट भए । दीपेन्द्रले ३५ बलमा ३ चौका र १ छक्का प्रहार गरे ।