एजेन्सी – भुटानले मलेसियामा जारी चार देश सम्मिलित टि२० आई सिरिजमा माल्दिभ्सलाई ६ रनले हराउँदै ऐतिहासिक जित हात पारेको छ । भुटानको टि२० आई अन्तर्राष्ट्रिय क्रिकेटमा यो पहिलो जित हो ।

जितको लागि १ सय ११ रनको विजयी लक्ष्य पछ्याएको माल्दिभ्सले २० ओभरमा ८ विकेट गुमाउँदै १ सय ४ रन बनायो । माल्दिभ्सका मोहम्मद रिजवानले १२ बलमा ४ चौकासहित सर्वाधिक १९ रन बनाए । अज्यान फहराथले १७, मोहम्मद आजम १५ र अली अलमानले ११ रन बनाए ।

भुटानका नामगे थिन्ले र जिग्मे सिंगेले ३–३ विकेट लिए । त्यसअघि युकेएम एसडी क्रिकेट ग्राउण्ड बांगीमा टस हारेर ब्याटिङ थालेको भुटानले निर्धारित २० ओभरमा ९ विकेट गुमाउँदै १ सय १० रन बनायो । भुटानका नामगे र गकुल घलेले १७–१७ रन बनाए ।

नेपालमा एभरेष्ट प्रिमियर लिग इपिएलको चौथो संस्करण ललितपुरबाट खेलेका मिक्यो दोर्जी भने ३ रनमा आउट भए ।
माल्दिभ्सका अज्यान फहराथले ४ ओभरमा १७ रन खर्चेर ३ विकेट लिए । उमर एडम, अहमद हसन र इब्राहिम रिजवानले दुई दुई विकेट लिए ।

भुटानले खेलेको यो पाँचौं अन्तर्राष्ट्रिय टि२० आई खेल हो । भुटानले २०१९ को १३ औं दक्षिण एसियाली खेलकुद (साग) डिसेम्बर ५ मा नेपालविरुद्ध टि२० आईमा डेब्यू गरेको थियो ।

चार देश सम्मिलित टि२० आई सिरिजमा मलेसिया ३ खेलमा ६ अंकका साथ शीर्षस्थानमा छ । माल्दिभ्स दुई खेलमा २ अंकका साथ दोस्रो स्थानमा छ । भुटान ३ खेलमा २ मा हार र १ मा जितका साथ तेस्रो स्थानमा छ । थाईल्यान्ड २ खेलमा अंक विहीन हुँदै पुछारमा छ । खेल डबल राउन्ड रोबिनको आधारमा हुनेछ । मलेसिया टि२० आई बरियता बढाउन यस सिरिज आयोजना गरेको अनुमान गरिएको छ ।