एजेन्सी – भारतले इंग्ल्यान्डसँगको तेस्रो अन्तिम टि२० आई खेल्दैछ । खेल नेपाली समय अनुसार बेलुका ७ : १५ मा ट्रेन्ट ब्रिज नोटिङ्घममा सुरु हुँदै छ । पहिलो खेलमा भारत ५० रन र दोस्रो खेलमा ४९ रनले विजयी हुँदै सिरिज एक खेल अगावै जितेको छ ।

सिरिज जितेको भारत क्लिनस्विप गर्ने सोचमा हुनेछ । घरेलु टोली इंग्ल्यान्ड अन्तिम खेलमा जितका साथ क्लिनस्विपबाट बच्न चाहन्छ । तर इंग्ल्यान्डले ब्याटिङमा भने सानदार प्रदर्शन गनुपर्ने हुन्छ । जस बटलरको कप्तानीमा रहेको इंग्ल्यान्डले सुरुवाती दुई खेलमा अपेक्षा अनुसार प्रदर्शन गर्न सकेको छैन ।

बटलर पहिलो खेलमा गोल्डेन र दोस्रो खेलमा ४ रनमा आउट भएका थिए । दुबै खेलमा बटलर भुवनेश्वर कुमारको बलमा आउट भएका थिए । अर्का ओपनर जेसन रोयको प्रदर्शन पनि राम्रो हुन सकेन । रोयको स्थान फिलिप साल्टलाई मौका दिनसक्छ ।
बटलर, डेविड मलान र लियाम लिभिङस्टोनको उच्च प्रदर्शन विना इंग्ल्यान्डलाई जित्न कठिन पर्नसक्छ ।

युवा ब्याटर ह्यारी ब्रुकले राम्रो प्रभाव देखाएका छन् । तर उनले ठूलो इनिङ खेल्नुपर्छ । मोईन अलीले भने दुबै खेलमा राम्रो प्रदर्शन गरेका छन् । साम करनले पनि दुबै खेलमा कमजोर प्रदर्शन गरेका छन् । जोनी बेयरस्टो र बेन स्टोक्सलाई इंग्ल्यान्डले विश्राम दिएको छ ।

डेब्यू खेलमा तीव्र गतिका रिचर्ड ग्लीसनले विराट कोहली, ऋषभ पन्त र रोहित शर्मालाई आउट गर्दै सानदार डेब्यू गरेका थिए । क्रिस जोर्डनले त्यसपछिका चार विकेट लिएका थिए । यी दुई जोडी भारतका खेलाडीलाई पुन निराश बनाउन सक्छ । तर स्पिनर म्याथ्यु पार्किन्सनको प्रदर्शन कमजोर छ ।

यता भारतले ओपनरमा रोहित र ऋषभ पन्तलाई निरन्तरता दिनेछ । दुबै खेलमा भारतले ओपनिङमा राम्रो सुरुवात गरेका छन् । विराट कोहली पहिलो खेलमा १ रनमा आउट भएका थिए । कोहलीलाई उच्च प्रदर्शनको दबाब छ । त्यसपछि हार्दिक पान्ड्या, सूर्यकुमार यादव र दिनेश कार्तिक हुनेछन् ।

भारतले सिरिज जिति सकेको हुँदा अवसर नपाएका खेलाडीलाई मौका दिनसक्छ । भारतले मध्यक्रममा श्रेयस ऐरलाई मौका दिनसक्छ । हर्षल र भुवनेश्वर मध्य एकलाई बेन्चमा राखेर उमरान मलिकलाई मौका दिनसक्छ । युजभेन्द्र चहलको स्थानमा रवि विश्रोईलाई मौका दिनसक्ने सम्भावना छ । रोहितले कप्तानीको रुपमा लगातार १५ टि२० आई खेल जितेका छन् ।