एजेन्सी – तीव्र गतिका बलर शफ्यान शरिफकोे पाँच विकेटमा स्कटल्यान्डले आइसिसी विश्वकप लिग २ त्रिकोणात्मक ओडिआई सिरिजमा नामिबियालाई ७७ रनले पराजित गरेको छ ।

टिटवुड ग्लासगो टस हारेर पहिला ब्याटिङको निम्तो पाएको स्कटल्यान्डले निर्धारित ५० ओभरमा ६ विकेट गुमाउँदै २ सय ५८ रन बनायो । स्कटल्यान्डका मध्यक्रमका ब्याटर जर्ज मुन्शेले १ सय ८ बलमा ७ चौका र १ छक्कासहित सर्वाधिक ७१ रनमा अविजित रहे ।

कलमु म्याकलेओडले ८२ बलमा ५ चौकासहित ५० रन बनाए । ओपनर काइल कोट्जर २९ र म्याथ्यु क्रस २८ रनमा आउट भए । नामिबियाका कप्तान गेर्हार्ड इरास्मसले सर्वाधिक तीन विकेट लिए ।

जितको लागि २ सय ५९ रनको विजयी लक्ष्य पछ्याएको नामिबिया ४३ ओभरमा १ सय ८१ रनमा अल आउट भयो । नामिबियाका जन निकोल लोफ्टी इटनले ५८ बलमा ४ चौका र १ छक्कासहित सर्वाधिक ५० रन बनाए । जेजे स्मित २८, लो ह्यान्डी लरेन्सले ४७ रन बनाए । अन्य ब्याटरले राम्रो प्रदर्शन गर्न सकेनन् ।

स्कटल्यान्डका शफ्यान शरिफले ९ ओभरमा ३५ रन खर्चेर ५ विकेट लिए । हम्जा ताहिर र मार्क वाट्ले २–२ विकेट लिए । स्कटल्यान्डले अव बुधबार नेपालसँग खेल्नेछ । नामिबिया र नेपालबीच आज प्रतिस्पर्धा हुँदैछ ।

अंक तालिका

ओमान ३६ खेलमा २१ मा जित र १३ मा हारका साथ ४४ अंक जोड्दै शीर्षस्थानमा छ । स्कटल्यान्ड २१ खेलमा १४ मा जित र ५ मा हारका साथ ३० अंक जोड्दै दोस्रो स्थानमा छ । युएई २२ खेलमा १२ मा जित र ८ मा हारसहित २६ अंकका साथ तेस्रो स्थानमा छ ।

अमेरिका २४ खेलमा ११ मा जित र १२ मा हारका साथ २२ अंक जोड्दै चौथो स्थानमा छ । नेपाल १६ खेलमा ७ मा जित र ८ मा हारका साथ १५ अंक जोड्लै पाँचौं स्थानमा छ । नामिबिया १५ खेलमा ७ मा जित र ८ मा हार सहित १४ अंकका साथ छैटौं स्थानमा छ । पपुवा न्युगिनी २० खेलमा १ मा जित र १९ मा हारका साथ पुछारमा छ ।