काठमाडौ (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजमा घरेलु टोेली स्कटल्यान्डविरुद्ध लज्जास्पद ब्याटिङ गर्दै १ सय २९ रनको सामान्य लक्ष्य दिएको छ । टिटवुड ग्लासगोमा टस हारेर पहिला ब्याटिङ गरेको नेपाल ३४.५ ओभरमा १ सय २८ रनमा अल आउट भयो ।

नेपालका ओपनर आसिफ शेख ५८ बलमा ६ चौकासहित सर्वाधिक ४० रनमा क्याच आउट भए । आसिफ स्पिनर मार्क वाट्टको १९ औं ओभरको तेस्रो बलमा विकेटकिपर म्याथ्यु क्रसबाट क्याच भए । तर अम्पायरको निर्णयमा भने आसिफ सन्तुष्ट थिएनन् । उनले एज नलागेको संकेत दिएका थिए ।

आसिफ आउट हुँदा नेपाल १८.३ ओभरमा ६४–३ को अवस्थामा थियो । थप ६ रन जोेड्न मध्यक्रमका तीन ब्याटर गुमाएपछि नेपाल समस्यामा परेको थियो । ओपनर कुशल भुर्तेल पुन खराब प्रदर्शन गर्दै आउट भए । कुशल स्पिनर मार्क वाट्टको छैटौं ओभरको दोस्रो बलमा १६ बल खेल्दै ३ रनमा क्याच आउट भए ।

देव खनाल गेभिन मेनको बलमा १० रनमा क्याच आउट भए । रोहित पौडेल २० औं ओभरको पाँचौं बलमा फस्ट स्लिपमा कलुम म्याकलेओडबाट १० रनमा क्याच भए । रोहितले १६ बलमा १ चौका प्रहार गरे ।

मार्क वाट्ले नै आरिफ शेखलाई २१ औं ओभरको तेस्रो बलमा कलुमबाट शून्यमा क्याच गराएपछि नेपाल संकटमा परेको थियो । दीपेन्द्र स्पिनर हम्जा ताहिरको बलमा एज लागेर विकेटकिपरबाट ७ रनमा क्याच आउट भए ।

स्कटल्यान्ड भ्रमणमा पहिलो खेल खेलेका विनोद भण्डारी २१ बलमा २ चौकासहित १३ रनमा आउट भए । भण्डारी ताहिरको बलमा प्वाइन्टमा खेल्ने धुनमा क्रिस ग्रिब्सलाई विकेट सुम्पेका थिए ।

करण केसी गेभिन मेनको बलमा ७ रनमा बोल्ड भए । सन्दीप लामिछाने २७ बलमा ३ चौकासहित २७ रनमा अन्तिम विकेटका रुपमा क्याच आउट भए ।

स्कटल्यान्डका स्पिनर हम्जा ताहिरले ७.५ ओभरमा १ मेडनसहित २६ रन खर्चेर ४ विकेट लिए । मार्क वाट्टले ८ ओभरमा १ मेडनसहित १९ रन खर्चेर ३ विकेट लिए । गेभिन मेनले दुई विकेट लिए ।